Në takimin mes kryeministrit të vendit Albin Kurti dhe kryeministrit në detyrë të Malit të Zi, Dritan Abazoviq, u diskutua për marrëdhëniet e mira fqinjësore në mes të dyja shteteve.
Në një konferencë për media pas takimit, Kurti bëri të ditur se temë diskutimi ishte edhe mundësia e rritjes së bashkëpunimit në fushën e ekonomisë, përcjell teve1.info
“Mundësitë e rritjes së bashkëpunimit në fushën e ekonomisë dhe investimit në infrastrukurë të përbashkët që e rrit mobilitetin dhe hap mundësitë e zhvillimit për të dy vendet tona, ishin në fokus të këtij bashkëbisedimi. Sot punojmë ngushtë si dy shtete fqinje për të promovuar paqen, sigurinë dhe prosporitetin në rajonin tonë”, deklaroi ai.
Kryeministri Kurti po ashtu theksoi se u është mirënjohës Malit të Zi që në kohërat më të vështira, u bënë strehë shpëtimi për qytetarët e Kosovës.
“Përtej marrëdhënieve të mira ndërshtetërore, kemi ndërtuar edhe raporte të mira ndërnjerëzore. Jemi mirënjohës që në kohërat më të vështira, Mali i Zi u bë strehë shpëtimi për mbi 100 mijë qytetarë të Kosovës, që u dëbuan nga fushata e gjenocidit dhe spastrimit etnik nga regjimi i Millosheviqit në vitet ‘98 –‘99”, potencoi kreu i Ekzekutivit.
Ai shtoi se në vitin 2022, eksportet e Kosovës në Mal të Zi janë rritur për 55%.
Gjatë këtij takimi u nënshkrua edhe marrëveshja për shfrytëzimin e hapësirës ajrore Kosovë – Mali i Zi. /Teve1.info/
