Kryeministri i Kosovës, Albin Kurti, ka zhvilluar takim me bashkatdhetarë në Berlin.
Në një njoftim që ka bërë Lëvizja Vetëvendosje, thuhet se në këtë takim ndër të tjera Kurti ka folur edhe për investimet në energjinë e ripërtrishme për të cilin është hapur ankandi.
Kurti ka thënë se mërgata vazhdon të jetë motor i zhvillimit ekonomik të Kosovës.
“Në këtë takim të përzemërt u diskutua për situatën politike në Kosovë, zhvillimet e fundit, si dhe u prezantuan të arriturat përgjatë këtyre dy vjet e nëntë muajve në qeverisje. Krahas miratimit të ligjit që ua mundëson bashkatdhetarëve votimin nëpër ambasada të Republikës tonë, kyçjes së të rinjve nga mërgata në Programin për Diplomaci, dhe investimeve që bashkatdhetarët kanë bërë në Kosovë, në këtë takim u fol edhe për rëndësinë e investimeve në sektorin e energjisë së ripërtrishme tash që është hapur ankadi. Mërgata jonë vazhdon të jetë motor qendror për zhvillimin ekonomik dhe demokratik të Republikës tonë”, thuhet në komunikatë.
Kurti, ishte i shoqëruar nga nënkryetarja e partisë, Mrika Limani Myrtaj, ministri, Hajrulla Çeku, dhe kryetari i Qendrës së Lëvizjes në Gjermani, Fahri Beqa, zhvilluan sot një takim me bashkatdhetarët tanë në Berlin të Gjermanisë.
Kurti po qëndron në Gjermani ku ka marrë pjesë në kongresin e Partisë Socialdemokrate të Gjermanisë.
