Ka filluar ceremonia e lansimit të thirrjes për mbështetje për investime në pajisje shtëpiake efiçiente, me ç’rast kryeministri Albin Kurti deklaroi se kjo masë është vazhdimësi e punës që Qeveria ka bërë për të rritur investimet në këtë fushë.
Kurti tha se kanë dëshmuar se sektori i energjisë është kyç për Qeverinë, me disa projekte të mëdha të cilat ka pasur vendi, përcjell teve1.info
“Se sektori i energjisë është kyç për Qeverinë tonë, e kemi dëshmuar duke filluar e fituar disa nga projektet më të mëdha e më inovative që i kemi pasur në vend”, theksoi Kurti.
“Sot po lansojmë masën e tretë me radhë, subvencionimin e pajisjeve shtëpiake për familje me fokus në përkrahjen e qytetarëve, në mbështetje të asistencës sociale dhe të prindërve vetëushqyes. Këto masa vijnë si vazhdimësi e punës që kemi bërë si Qeveri për të rritur investimet në efiçiencë të energjisë, krahas punës që kemi bërë për vendosje të objektivat ambicioze në strategjinë tonë të energjisë”, deklaroi ai.
Kreu i Ekzekutivit potenci se skema e subvencionimit të pajisjeve efiçiente ka rezultuar aq e suksesshme, saqë është arritur të trefishohet buxheti për këtë vit.
“Për më tepër, për të nxitur kursimin e energjisë e për të zbutur ndikimin e rritjes së çmimit të energjisë elektrike, me mbi 120 milionë euro të ndara, kemi subvencionuar direkt faturat e energjisë elektrike për 208 mijë familje kurimstre, dhe njëkohësisht kemi subvencionuar tarifat e reja për secilën familje dhe biznes në vend që nga shkurt i vitit 2022. Me rreth 9 milionë euro kemi renovuar e bërë efiçiente shtatë ndërtesa publike, shkolla, çerdhe të fëmijëve, qendra shëndetësore e stacione të zjarrfikësve”, u shpreh Kurti.
Në këtë ceremoni të pranishëm janë edhe ministrja e Ekonomisë, Artane Rizvanolli dhe Alessandro Bianciardi nga Zyra e BE-së në Kosovë. /Teve1.info/
