ryeministri i Kosovës, Albin Kurti, ka kujtuar sot në Facebook katër dëshmorët e Ushtrisë Çlirimtare të Kosovës që ranë në luftime më 22 shtator 1998, duke theksuar rëndësinë e sakrificës së tyre për lirinë e vendit.
Në postimin e tij, Kurti shkruan:
“Katër dëshmorë të Ushtrisë Çlirimtare të Kosovës të rënë në luftime më 22 shtator 1998, përmbledhin në një rast të vetëm shumëçka nga natyra e vërtetë e luftës së drejtë të UÇK-së.”
Ai përmend figurat e Fehmi dhe Xhevë Lladrovcit, Fatime Hetemit dhe Shefqet Zekës, duke përshkruar angazhimin dhe historinë e tyre:
“Fehmi Lladrovci, i formuar në Universitetin e Zagrebit dhe i burgosur politik, u kthye në Kosovë më 1997 dhe u bë një nga figurat më aktive të UÇK-së. Xhevë Krasniqi Lladrovci, bashkëshortja dhe partnerja e tij në përpjekjet për liri, mbeti shembull i përkushtimit për atdhe. Fatime Hetemi dhe Shefqet Zeka iu bashkuan luftës me guxim dhe sakrificë, duke dhënë jetën për lirinë e Kosovës.”
Kurti kujton se katër dëshmorët ranë në fshatin Gradinë gjatë një depërtimi të forcave serbe:
“Më 22 shtator 1998, gjatë një depërtimi të forcave serbe në drejtim të Çikatovës dhe Gllanasellës, këta katër luftëtarë të UÇK-së ranë dëshmorë. Lavdi Fehmi dhe Xhevë Lladrovcit, lavdi Fatime Hetemit dhe Shefqet Zekës që me angazhimin e tyre më total, duke e dhënë edhe jetën për atdheun, ia sollën lirinë Kosovës.”
