Kryeministri i Kosovës, Albin Kurti, ka deklaruar se vendi nuk ka nevojë për zgjedhje të reja, duke theksuar se ato do të ishin “humbje kohe dhe mjetesh buxhetore”, në një situatë ku sipas tij mungon vullneti i opozitës për kompromis politik.
Në një deklaratë publike drejtuar qytetarëve, Kurti tha se pas zgjedhjeve të fundit, vullneti i qytetarëve duhet të respektohet dhe të reflektohet në funksionimin e institucioneve.
Sipas tij, Lëvizja Vetëvendosje ka fituar shumicën e votave dhe deputetëve, duke siguruar 66 ulëse me partnerët e koalicionit, dhe për këtë arsye duhet të merret parasysh në proceset vendimmarrëse.
Kurti tha se ka bërë disa oferta për bashkëpunim me partitë opozitare, përfshirë Lidhjen Demokratike të Kosovës dhe Partinë Demokratike të Kosovës, duke ofruar poste ekzekutive dhe zgjidhje institucionale për zhbllokimin e situatës politike, por sipas tij këto janë refuzuar.
Ai përmendi edhe propozime për rishpërndarje të pozitave në Kuvend dhe kandidatura konsensuale për president, duke theksuar se mungesa e marrëveshjes po mban peng zgjedhjen e kreut të shtetit.
Ai shtoi se partitë opozitare po refuzojnë bashkëpunimin, ndërsa theksoi se stabiliteti institucional duhet të jetë prioritet mbi interesat partiake.
