Kryeministri në detyrë i Republikës së Kosovës, Albin Kurti, ka mirëpritur të hënën anëtarë të Shoqatës Gjermane për Kombet e Bashkuara (DGVN), me të cilët ka diskutuar mbi arritjet dhe sukseset e qeverisë gjatë këtij mandati.
Sipas Zyrës së Kryeministrit, Kurti ka theksuar se gjatë katër viteve të fundit, rritja ekonomike mesatare e Kosovës ka qenë rreth 6%, duke paralajmëruar se sipas FMN-së, Kosova do të vazhdojë të jetë lider në rajon edhe këtë vit përsa i përket rritjes ekonomike.
“Kjo është arritur ndër të tjera edhe falë dyfishimit të investimeve të huaja direkte, dyfishimit të eksporteve dhe uljes së papunësisë”, ka theksuar ai.
Gjithashtu, Kurti ka shtuar se, në përputhje me modelin gjerman, Kosova po lidh arsimin me tregun e punës përmes një sistemi dual.
Në përmbledhje të arritjeve të tjera të qeverisë, kryeministri në detyrë ka përmendur edhe liberalizimin e vizave, i cili ka mundësuar lëvizjen e lirë drejt vendeve të zonës Shengen.
“Kryeministri foli edhe rreth rëndësisë së diasporës, veçanërisht në Gjermani ku jetojnë rreth 600 mijë shqiptarë, të cilët janë urë e fuqishme në ndërlidhjen mes dy shteteve tona. Duke i falënderuar Shoqatën Gjermane për Kombet e Bashkuara për bashkëbisedimin dhe vizitën në vendin tonë, kryeministri Kurti i uroi qëndrim të frytshëm dhe produktiv në Kosovë”, thuhet në komunikatë.
