Është momenti i fundit që Milan Radoiçiq t’i dorëzohet autoriteteve të drejtësisë të Kosovës.
Kështu tha kryeministri Albin Kurti gjatë takimit në Chicago me senatorin amerikan Chris Murphy, në margjinat e Koventës Kombëtare Demokratike.
Kurti ka kërkuar nga SHBA-ja t’i bëjë presion Beogradit për arrestimin e Millan Radoiçiqit.
“Tash kur po bëhen 11 muaj nga vrasja e rreshterit tonë policor Afrim Bunjaku në Banjskë të Zveçanit, është koha e fundit që kryekrimineli Millan Radojçiq t’i dorëzohet autoriteteve të drejtësisë së Kosovës dhe për këtë kryeministri Kurti kërkoi që SHBA-të të bëjnë trysni mbi Beogradin zyrtar”, thuhet nga Kryeministria.
Në njoftimin e Kryeministrisë është thënë se ndër temat ka qenë çështja e dialogut me Serbinë
“Në lidhje me dialogun me Serbinë, kryeministri Kurti theksoi përkushtimin e Kosovës në zbatimin në plotni të Marrëveshjes Bazike dhe Aneksit Implementues të Ohrit. Ai shtoi se për t’u zbatuar marrëveshja, nevojitet pranimi i saj edhe nga ana e Serbisë, duke e nënshkruar atë si dëshmi e garanci të angazhimit në zbatimin e marrëveshjes. Kryeministri Kurti nënvizoi se Serbia duhet të tërheqë letrën e dërguar drejt Bashkimit Evropian nga ana e ish-kryeministres Brnabiq dhjetorin e vitit të kaluar, përmes së cilës shprehet refuzimi dhe tërheqja nga marrëveshja nga ana e Serbisë. Serbia duhet të kthehet te marrëveshja dhe ta respektojë atë në mënyrë që e njëjta të zbatohet. Nuk ka zbatim të marrëveshjes sepse para së gjithash nuk po ka respektim të saj”, thuhet nga Zyra e Kryeministrit.
