Kryeministri në detyrë i Kosovës, Albin Kurti, në kuadër të konferencës ndërkombëtare Future Industry Minds 2026 në Gjermania, ka zhvilluar një takim bilateral me Micong Klimes, zyrtare për Kosovën në Ministrinë Federale për Bashkëpunim Ekonomik dhe Zhvillim (BMZ).
Gjatë takimit, Kurti ka shprehur mirënjohje për mbështetjen shumëvjeçare të Gjermanisë ndaj Kosovës, duke përmendur kontributin në zhvillimin e shoqërisë, infrastrukturës, shërbimeve dhe institucioneve përmes BMZ-së, GIZ-it dhe KfW-së, si dhe përmes financimit të organizatave të shoqërisë civile.
Sipas njoftimit zyrtar, kryeministri në detyrë ka theksuar nevojën për kalimin në një fazë të re të bashkëpunimit ndërmjet dy vendeve, nga ndihma financiare drejt investimeve të përbashkëta ekonomike.
Ai ka deklaruar se, përveç granteve, Kosova ka nevojë për qasje më të madhe në treg, investime dhe transferim të njohurive industriale që kontribuojnë në hapjen e vendeve të reja të punës dhe zhvillimin ekonomik.
Kurti po ashtu ka vlerësuar rolin e mërgatës kosovare në Gjermani, duke theksuar se ajo po krijon ura lidhëse ndërmjet dy shteteve.
Ai ka nënvizuar rëndësinë e krijimit të një platforme të strukturuar bashkëpunimi bilateral që do të mundësonte rritjen e investimeve dhe forcimin e marrëdhënieve ekonomike mes Kosovës dhe Gjermanisë.
