Në publik, kryeministri në detyrë, Albin Kurti, ka qenë i rezervuar në deklaratat e tij për Gjykatën Speciale në Hagë, ku po gjykohen për krime lufte ish-krerët e Ushtrisë Çlirimtare të Kosovës.
Por gjatë së mërkurës, Kurti publikoi një shkrim të gjatë në rrjetin social Facebook, ku i kishte kërkuar kryetares së Dhomave të Specializuara, Ekaterina Trendafilova, lirimin e ish-krerëve të UÇK-së.
Ai tha se për këtë çështje kishte punuar për një kohë të gjatë, por në heshtje.
“E bëj publike sot për një arsye të vetme: sepse besoj se është e drejtë që ata të kthehen në shtëpitë e tyre, të jenë pranë familjeve të tyre dhe ta mbrojnë në liri luftën e drejtë çlirimtare të Kosovës. Përgjigjja e znj. Trendafilova, pas dy javësh që mori letrën nga unë, nuk ndryshoi asgjë. Kërkesat e paraqitura nuk morën zgjidhje,” deklaroi Kurti.
I shqetësuar me procesin gjyqësor në Hagë është shprehur edhe ish-ministri i Punëve të Jashtme, Petrit Selimi. Ai thotë se është e pashpjegueshme se si ish-presidenti Thaçi dhe të tjerët kanë qëndruar kaq gjatë në paraburgim, ndonëse disa shtete perëndimore kanë ofruar garanci për ta.
“Kanë kaluar pesë vjet që kur ish-krerët e Ushtrisë Çlirimtare të Kosovës po mbahen në dhomat e paraburgimit në Hagë. Presidenti Thaçi ishte në aeroplan, duke udhëtuar për në Shtetet e Bashkuara të Amerikës për t’u takuar me presidentin Trump, kur iu shpall aktakuza. Shumë njerëz, me të drejtë, mbetën të befasuar dhe kjo i shtyu të mendojnë se ky proces ka prapavijë politike. Përveç kësaj, është e pakuptueshme se pse ata janë mbajtur kaq gjatë në paraburgim, pavarësisht që disa shtete perëndimore kanë dhënë garanci për ta. Për më tepër, ata kanë qëndruar të mbyllur për gati tri vite pa filluar procesi gjyqësor ndaj tyre. Mbajtja kaq e gjatë në paraburgim përbën shkelje të të drejtave të njeriut. Gjykata Speciale është themeluar si kompromis ndaj administratës amerikane, e cila kishte insistuar që të krijohej një gjykatë, përndryshe ajo do të themelohej nga Kombet e Bashkuara. Kosova e respektoi atë marrëveshje. Fillimisht, akuzat ishin për trafikim organesh në të ashtuquajturën ‘shtëpi të verdhë’ në Shqipëri, por në fund doli diçka krejt tjetër,” tha Selimi.
Tutje, ai shtoi se shteti i Kosovës ka bërë shumë pak për t’i dalë në mbrojtje ish-krerëve të UÇK-së.
“Shteti i Kosovës, mund të thuhet, ka bërë shumë pak — de facto e ka degraduar mbrojtjen e presidentit Thaçi dhe të të akuzuarve të tjerë. Kuvendi i Kosovës e ka miratuar ligjin për mbrojtjen dhe mbulimin e shpenzimeve, por më pas këto shpenzime u kufizuan tej mase me një akt rregullativ nga ministrja e Drejtësisë, nga radhët e Vetëvendosjes. Edhe sot e kësaj dite, qeveria deklaron se ka paguar rreth 30 milionë euro për këtë proces. Por duke pasur parasysh se procesi ka zgjatur pesë vjet dhe ka përfshirë rreth dhjetë të akuzuar, atëherë mesatarja e pagesës për një vit del të jetë diku ndërmjet 600 deri në 700 mijë dollarë. Nëse e krahasojmë me Kroacinë, e cila ka paguar mbi 40 milionë dollarë për mbrojtjen e gjeneralit të saj, Gotovina, i cili në fund u lirua, del se Kosova është kujdesur shumë më pak për gjeneralët e vet. Natyrisht, një mbrojtje e vërtetë kushton shumë, por jo aq sa pretendon kjo qeveri,” deklaroi Selimi.
Ndërkohë, avokatët mbrojtës kanë theksuar se Ushtria Çlirimtare e Kosovës nuk do të kishte fituar mbështetjen e bashkësisë ndërkombëtare nëse do të kishte ekzistuar një plan kriminal, siç pretendojnë prokurorët.
