Muaji shkurt parashihet të jetë koha kur Kosova do t’i ketë funksionale institucionet e veta.
Të paktën kështu edhe shprehur i pari i partisë fituese në zgjedhjet e 28 dhjetorit, Albin Kurti.
Sipas tij, nga ana e Vetëvendosjes ka gatishmëri për bashkëpunim edhe me opozitën.
“Ne populli na ka dhënë një mbështetje shumë të madhe, që është përgjegjësi e lartë për neve. Për formimin e qeverisë nuk do të kemi asnjë problem, por për dy të tretat e votave kur nevojiten në Kuvend, prej marrëveshjeve ndërkombëtare e deri te rizgjedhja e presidentes apo zgjedhja e presidentit, ne kemi nevojë për bashkëpunim me opozitën. Por, nga ana jonë gatishmëria dhe interesimi ekziston. Në muajin shkurt do ta shohim se a ka gatishmëri e interesim edhe nga opozita”, deklaroi ai.
Sa i përket manipulimeve me vota që solli në pah procesi i rinumërimit, Kurti tha se secili që ka manipuluar vota duhet të përballet me ligjin.
“Ekzistojnë proceset e sistemit të drejtësisë dhe ne jemi të hapur për të gjitha hetimet që do të zhvillohen. Është e rëndësishme të theksohet që nuk ka amnisti për asnjë keqbërës, për këdo i cili ka manipuluar gjatë evidentimit apo numërimit dhe hetimet le të shkojnë deri në fund”.
E atëherë kur edhe ta fillon mandatin e tij të tretë, Kurti tha se në kaudër të anëtarësimit të Kosovës në Bordin e Paqes, shteti do të jetë i gatshëm të kontribuojë kudo që ka nevojë.
“Unë jam kryeministër në detyrë, nuk jam ende në mandatin tim të tretë, por kudo që ka nevojë për paqe në botë, ne dëshirojmë që të kontribuojmë, sepse kemi qenë përfitues të paqes në vendin tonë nëpërmjet forcave ndërkombëtare, andaj tash duam që të marrim pjesë me forcat tona dhe kapacitetet tona edhe në paraqet në vende të ndryshme të botës. Sa i përket Gazës, ju e dini që ne i kemi ndarë gjysmë milioni euro si qeveri dhe ky është një proces i cili do të vazhdojë edhe në vijim”, deklaroi Kurti.
Kurti në këtë deklarim për media, foli edhe për kompaninë e cila pretendon se prodhon dronë ushtarak, por që në fakt nuk ka leje nga Ministria e Mbrojtjes.
Këtë kompani, e kishte vizituar vet kryeministri në detyrë para disa muajve.
“Unë kam vizituar me qindra kompani anë e mbanë Kosovës gjatë këtij katërvjeçari. Nuk mund të them që mund t’i di të gjitha hollësitë e secilës kompani. Mirëpo, natyrisht që unë jam i hapur që t’i dëgjoj edhe kritikat atëherë kur diçka nuk ka qenë ashtu siç më është prezantuar”, tha ai.
Pretendimet e kësaj kompanie për prodhim dronësh, ka ngjallur reagime të shumta.
