“Nuk e kuptoj pse gjithë kjo rezistencë e partive opozitare kundër votimit të fshehtë, kur dihet që më 9 shkurt qytetarët e Kosovës kanë votuar me votë të fshehtë, të lirë e demokratike dhe e kanë bërë VV-në fituese”, ka thënë Kurti.
Edhe njëherë e përsëriti këtë kërkesë për partitë opozitare.
Kryeministri në detyrë, Albin Kurti po këmbëngulë që me patjetër të provohet emri i Albulena Haxhiut për kryeparlamentare.
“I pari është ai që t’i delegojnë përfaqësuesit partitë politike dhe me atë rast nëse nuk e duan votimin e fshehtë, ta rrëzojmë atë komision me votë, sepse pa votë nuk rrëzohet, me bojkot nuk shkohet përpara. E dyta, le ta provojmë votimin e fshehtë, o fiton Albulena, o ne e sjellim një emër tjetër”, ka thënë tutje Kurti.
Sipas profesorit universitar, Dorajet Imeri këto qëndrime nuk po lëvizin sepse partitë nuk po i besojnë më njëra tjetrës.
“Dështimi nuk është për shkak të emrave të përveçëm ose sjelljeve politike, por për shkak të humbjes së besimit reciprok në mes partive dhe kjo është edhe më e dëmshme sesa votimi ose mos-votimi i një emri të kandidatit të përvecëm. Unë konsideroj se kryeministri Kurti, përkatësisht kryetari i Lëvizjes Vetëvendosje duhet të shkoj një hap më tej dhe kjo besoj që është në të mirën edhe të subjektit të tij politik sikundër edhe të gjithë skenës politike të Kosovës”, ka thënë Imeri.
Për profesorin Avdi Smajljaj, sjelljet e partive politike në vend janë shenja që mund të pamundësojnë qeverisjen në të ardhmen.
“Zgjidhja e vetme duket që është që njëra palë të lëshoj pe, mirëpo siç duket të dyja palët janë barrikaduar në qëndrime e tyre, po e shohin vendimin e Gjykatës Kushtetues ashtu siç atyre po iu konvenon jo siç ai aktualisht është dhe kjo tregon se të dyja palët janë duke e luajtur rolin e vet në këtë bllokadë dhe në këtë krizë institucionale normalisht përgjegjësinë më të madhe e kanë ata që kanë numra më shumë në Kuvend por përgjegjësia është e të gjithëve dhe barrikadimi i të dyja palëve në këto qëndrime të pathyeshme nuk e çon vendin askund tjetër përveç një themelimi dhe zgjerimi të krizës që aktualisht është duke ekzistuar”, Smajljaj
Të martën është tentimi i radhës i deputetëve për konstituim të Kuvendit të Kosovës.
