Pas gjetjes së trupit të pajetë të mërgimtarit, Rrahim Latifi në liqenin e Ujmanit, kryeministri në detyrë, Albin Kurti i ka shprehur ngushëllime familjes Latifi.
Kurti ka falënderuar të gjitha ekipet e kërkim-shpëtimit për punën profesionale, përkushtimin dhe angazhimin deri në gjetjen e trupit të pajetë të Latifit, duke filluar nga Agjencia e Menaxhimit të Emergjencave, Forca e Sigurisë së Kosovës, Policia e Kosovës, Shoqata e Kosovës për Kërkim dhe Shpëtim, Klubi i Zhytjes “Trepça” dhe KFOR-i.
“Falënderoj Agjencinë e Menaxhimit të Emergjencave, Forcën e Sigurisë së Kosovës, Policinë e Kosovës, Shoqatën e Kosovës për Kërkim dhe Shpëtim, Klubin e Zhytjes “Trepça” dhe KFOR-in për punën profesionale, përkushtimin e jashtëzakonshëm dhe angazhimin e pareshtur deri në gjetjen e trupit të pajetë të Rrahim Latifit në liqenin e Ujmanit.
Familjes Latifi i shprehim ngushëllimet më të përzemërta dhe ju qëndrojmë pranë në këto momente të vështira për të ofruar gjithë mbështetjen tonë e për të ndarë me ta dhimbjen e madhe”, ka shkruar Kurti në Facebook.
33-vjeçari, Rrahim Latifi, të dielën kishte kërcyer nga ura në Liqenin e Ujmanit dhe më nuk kishte dalë nga uji.
Në dy ditë të kërkimeve intensive nga Policia dhe Shoqata e Kërkim-Shpëtimit, nuk pati rezultat, teksa sot në mëngjes në këtë operacion u përfshi edhe FSK-ja.
