Kryeministri Albin Kurti ka thënë se asnjë zyrtar apo diplomat nuk duhet të ketë dilema, se cila mes Kosovës dhe Serbisë ka të drejtë në zhvillimet e fundit që po ndodhin në veri të vendit.
Kurti ka thënë se lufta është mes një Republike demokratike dhe strukturave kriminale.
“E kemi KFOR-in, EULEX-in, i kemi para së gjithash dhe mbi së gjithash e para së gjithash policinë e Kosovës që po zbaton rend dhe ligj dhe i kemi strukturat ilegale të Serbisë. Është një konflikt mes Republikës më demokratike me policinë më profesionale dhe të orientuar nga perëndimi në rajon dhe në anën tjetër me struktura kriminale të një shteti autokratik. Është një konflikt mes këtyre dyjave dhe mes këtyre dyjave nuk do të duhej të ketë zyrtar, diplomat, politikan të perëndimit diplomatik që ka dilema se cila është ana e drejtë”, ka thënë kryeministri në një konferencë për shtyp.
Duke i komentuar deklaratat e emisarit Escobar se tensionet mes Kosovës dhe Serbisë mund të shndërrohen në konflikt rajonal, ai ka këshilluar që Escobar të pyetet se për cilat shtete e ka patur fjalën, përveç Kosovës dhe Serbisë.
“Konflikt rajonal, siç paska thënë se unë nuk e kam parë, Escobar, i bie që nuk janë veç dy shtete. Ka më shumë se dy shtete. Tash mbase ndodheni në konferencën e gabuar për media, është dashur të jeni në atë konferencën tjetër ta pyesni atë: Cilat shtete tjera përveç Kosovës dhe Serbisë besoni që do të përfshihen, meqenëse thoni se konflikti do të jetë rajonal. Unë nuk e di. Mali i Zi? S’ma merr mendja. Maqedonia e Veriut? S’besoj. Kryeministri Edi Rama ka kërcënu Beogradin, ndoshta. Por ju atje duhet t’i pyesni se unë i di shumë gjëra po jo edhe aq shumë. Pra do të duhej që emisarin Escobar ta pyesni, kur ka thënë konflikt rajonal cilat shtete i ka mendu përveç Kosovës dhe Serbisë”, ka shtuar Kurti në një konferencë për media, transmeton teve1.info.
