Kryeministri në detyrë, Albin Kurti, ka thënë se formimi i institucioneve të reja sa më shpejtë pas zgjedhjeve të 9 shkurti është interes i përbashkët.
Ai ka thënë është në interes të qytetarëve që sipas tij punët e mira të vazhdojnë e disa të nisin.
Këtë Kurti e ka thënë pas takimeve që ka zhvilluar me deputetë të zgjedhur dhe përfaqësues politikë të komunitetit serb, boshnjak, egjiptian, turk, rom, ashkali dhe goran.
“Gjatë këtyre katër vjetëve të mandatit tonë të parë të plotë qeverisës kemi dëshmuar që angazhohemi për një Republikë të të gjithëve, jo vetëm shumicës. Për zhvillim të gjithmbarshëm, nga i cili përfitojmë të gjithë, pa dallim, pa diskriminim. Si shumicë, përgjegjësia na takon neve, por përfshirja, pjesëmarrja, angazhimi dhe kontributi i komuniteteve joshumicë, ka qenë dhe është thelbësor në këtë qëllim. Falënderoj të gjithë për diskutimet e hapura që kemi zhvilluar sot. Konstituimi i kuvendit dhe formimi i qeverisë pa vonesa është interes i përbashkët, sepse është në interes të qytetarëve të Republikës dhe vullnet i qartë qytetar që punët e mira të vazhdojnë e shumë tjera të nisin”, ka shkruar Kurti në Facebook.
