Kryeministri në detyrë i Kosovës, Albin Kurti, gjatë ceremonisë së vendosjes së gurthemeleve për ndërtimin e dy urave të reja mbi lumin Ibër, tha se ndërtimi i tyre synon të forcojë lidhjen dhe bashkëpunimin mes veriut dhe jugut të Mitrovicës.
“Kemi ardhur këtu që të tregojmë përkushtimin tonë që ndërmjet veriut dhe jugut të ketë sa më shumë komunikim, qarkullim, bashkëpunim e shkëmbime,” tha Kurti.
Kurti pasi ka vendosur du gurthemelet e urave, ka thënë se është kryeministër i Kosovës dhe se të gjitha veprimet po i bëjnë në përputhje me planet dhe në bazë të ligjit.
“Unë jam kryeministër i Kosovës. Këta janë ministra të Kosovës. Janë kryetar të Komunave të Kosovës. Gjithçka që bëjmë është në përputhje me planet tona, sipas ligjit dhe për të mirën e të gjithë qytetarëve”, ka thënë Kurti.Ai tutje ka thënë se ata që kanë dilema, mund ta kontaktojnë Qeverinë e Kosovës për të marrë shpjegime.Ata që kanë dilema, lirisht mund të na kontaktojnë dhe ua shpjegojmë me përpikmëri dhe durim”, ka thënë Kurti.
Ai bëri të ditur se dy urat e reja do të ndërtohen në të dy anët e Urës Kryesore mbi lumin Ibër. Njëra prej tyre do të jetë për automjete dhe këmbësorë, ndërsa tjetra vetëm për këmbësorë.
Sipas Kurtit:
-
Ura për automjete dhe këmbësorë do të ketë një gjatësi prej 51 metrash dhe gjerësi prej 10 metrash;
-
Ura për këmbësorë do të jetë 22 metra e gjatë dhe 3.7 metra e gjerë.
Këto investime vijnë si pjesë e Memorandumit të Bashkëpunimit ndërmjet Ministrisë së Mjedisit, Planifikimit Hapësinor dhe Infrastrukturës dhe komunave të Mitrovicës së jugut dhe veriut. Synimi i këtij projekti është përmirësimi i infrastrukturës dhe rritja e lëvizjes së lirë për qytetarët në të dy anët e qytetit.
