Kryeministri i Kosovës, Albin Kurti, ka reaguar pas nisjes së punimeve për ndërtimin e dy urave të reja mbi lumin Ibër në qytetin e Mitrovicës. Përmes një postimi në Facebook, ai ka bërë të ditur se projektet pritet të përfundojnë gjatë stinës së vjeshtës.
“77 ura janë gjithsej përgjatë lumit Ibër. Prej tyre, 35 janë në Kosovë. Në vjeshtë bëhen 37, sepse punimet për ndërtimin e dy urave të reja nisën sot në Mitrovicë,” ka shkruar Kurti.
Sipas tij, njëra nga urat do të jetë për automjete dhe këmbësorë, me gjatësi 51 metra dhe gjerësi 10 metra, prej të cilave 3 metra trotuar janë të dedikuara për këmbësorë (nga 1.5 metra në të dyja anët). Ura tjetër do të jetë vetëm për këmbësorë, me një gjatësi prej 41 metrash dhe gjerësi 3.7 metra.
Ky projekt është rezultat i Memorandumit të Bashkëpunimit ndërmjet Ministrisë së Mjedisit, Planifikimit Hapësinor dhe Infrastrukturës dhe dy komunave të Mitrovicës – së jugut dhe veriut.
Kurti theksoi se vlera totale e investimit është afër 3 milionë euro, dhe projekti synon të përmirësojë infrastrukturën, komunikimin dhe integrimin urban në qytetin e ndarë nga lumi Ibër.
