Kryeministri i Kosovës Albin Kurti dhe ministri i Bujqësisë, Faton Peci të hënën kanë marrë pjesë në nisjen e punimeve të projektit për modernizimin dhe përmirësimin e sistemit të ujitjes Radoniq-Dukagjin, në Komunën e Gjakovës.
Kryeministri Kurti ka thënë se projekti ka vlerë 9.15 milionë euro, është i financuar nga Komisioni Evropian dhe zbatohet nga Banka Botërore.
Ai gjithashtu e ka cilësuar edhe si dëshmi të raportit të shëndoshë me partnerët ndërkombëtarë.
“Përurimi i tretë për sot i fillimit të punimeve të projekteve të rëndësishme. Pas komunës së Zveçanit dhe Drenasit, kësaj radhe me ministrin e Bujqësisë Faton Peci ishim në Komunën e Gjakovës, në Lugbunar, me rastin e nisjes së punimeve të projektit për modernizimin dhe përmirësimin e sistemit të ujitjes Radoniq-Dukagjin. Projekti ka vlerë 9.15 milionë euro, është i financuar nga Komisioni Evropian dhe zbatohet nga Banka Botërore. Përmes tij, 11,750 hektarëve të tokës bujqësore u mundësohet efikasitet më i lartë i menaxhimit të ujit, si dhe do të funksionalizohet sistemi i ujitjes Dukagjini. Ky projekt është dëshmi e rezultat i raportit të shëndoshë me partnerët tanë pasi që vetëm gjatë qeverisjes sonë, në sektorin e bujqësisë vlera e mbështetjes nga partneritetet ndërkombëtare është 51 milionë euro. Kjo ka ndodhur edhe për faktin se ata e kanë parë vëmendjen që Qeveria jonë i ka dhënë bujqësisë. E konfirmimi më i mirë nga ne u bë së fundi me buxhetin për vitin 2025 të cilin e miratuam në Kuvend javën që shkoi, ku për fushën e bujqësisë kemi paraparë 90 milionë euro e që së bashku me projektet e financuara nga partnerët ndërkombëtarë kjo shifër e tejkalon vlerën e 100 milionë euro. Ky është viti i dytë me radhë që bujqësia do të ketë buxhet vjetor mbi 100 milionë euro, ashtu edhe siç jemi zotuar. I jemi mirënjohjes partnerëve tanë ndërkombëtarë për mbështetjen edhe bashkëpunimin. Punime të mbara e të shpejta”, ka shkruar ai në Facebook./teve1.info/
