Kryeministri i Kosovës, Albin Kurti në një konferencë për media ka deklaruar se buxheti i planifikuar për vitin 2025 shënon mbi 3.6 miliardë euro, sipas kryeministrit krahasuar me vitin 2020 është 60% më i lartë.
I pari i Qeverisë shtoi se për gjatë këtyre katër viteve qeverisje, ekzekutivi ka arritur që të bënë transformime rrënjësore që janë në të mirë të qytetarëve.
Derisa, kryeministri tha se të hyrat buxhetore të projektuara janë 3.3 miliardë euro, ku shtoi se kjo është 90% më e lartë se sa në vitin 2020 para qeverisjes së Kurtit.
“Për këto katër vite qeverisje kemi arritur që të bëjmë transformime rrënjësore që janë në të mirë të qytetarëve, njëra nga këto transformime është edhe buxheti i shtetit, për gjatë qeverisjes sonë kemi arritur që t`i rrisim të hyrat buxhetore si asnjëherë më parë, teksa po përgatisim buxhetin për vitin 2025, të hyrat buxhetore të projektuara janë 3.3 miliardë euro, kjo është për 90% më e lartë sesa niveli në vitin 2020 para qeverisjes sonë apo nëse e krahasojmë me vitin para pandemik 2019 është 84% më e lartë. Të hyrat më të larta na kanë mundësuar edhe buxhet më të lartë pa e ngarkuar arkën e shtetit me deficit buxhetor apo me borxh publik. Për vitin 2025 buxheti i planifikuar për shpenzim shënon nivelin mbi 3.6 miliardë euro që krahasuar me vitin 2020 është për 60% më i lartë”, ka deklaruar Kurti.
Ndryshe, Kurti ka përmendur edhe rritjen e të hyrave tatimore.
“Rritjen e të hyrave e kemi rritur duke e shtrirë barrën tatimore edhe tek ata që në të kaluarën konsideroheshin më të fortë se shteti, e shteti nuk guxonte t`u shkonte të dera për t’ua kërkuar tatimin”, ka theksuar Kurti./teve1.info/
