Serbia dëshiron statusin e “Rusisë së vogël” në Ballkan, ku entiteti i Republika Srpska në Bosnje dhe Hercegovinë do të bëhet “Bjellorusia e vogël”.
Kështu deklaroi kryeministri i Kosovës, Albin Kurti, për gazetën malazeze “Pobjeda”.
Duke folur për sulmin terrorist të 24 shtatorit, dhe për Millan Radoiçiq, i cili ka marrë përsipër sulmin, Kurti është shprehur se arrestimit dhe më pas lirimi i tij “ta kujton marrëveshjen e Pablo Escobarit me presidentin e Kolumbisë”.
“Arrestimi dhe lirimi i Radoiçiqit të kujton marrëveshjen e Pablo Escobarit me presidentin e Kolumbisë: Escobar në fakt do të pranonte të shkonte në burg me kusht që të vendosej në burgun e tij, të ndërtuar në mënyrë të pavarur, në të cilin do të kontrolloni komandantët dhe jo anasjelltas; mirë, gjoja do ta vuante dënimin atje”, ka thënë Kurti.
Gjithashtu, Kurti ka deklaruar se të gjithë “terroristët” që kanë arritur të arratisen duhet t’u dorëzohen autoriteteve të Kosovës.
“Të gjithë terroristët që kanë arritur të arratisen duhet t’u dorëzohen autoriteteve të Republikës së Kosovës. Organizatat ‘Mbrojtja Civile’ dhe ‘Brigada e Veriut’ duhet të shpallen organizata terroriste nga vendet tona mike, partnere dhe aleate. Qeveria e Republikës së Kosovës tashmë e ka bërë këtë në seancën e 29 qershorit të këtij viti”, tha kryeministri i vendit.
I pyetur se sa është Rusia e përfshirë në terrorizmin në veri të Kosovës, Kurti ka thënë regjimi i Beogradit është klientelist, më i afërti me atë në Moskë.
“Destabilizimi i rajonit të Ballkanit Perëndimor është mjeti kryesor i Beogradit, i cili funksionon edhe për Kremlinin. Regjimi i Beogradit është klientelist, më i afërti me atë në Moskë. Serbia nuk beson në vlerat demokratike, nuk dëshiron demokracinë, të cilën e sheh ekskluzivisht si mjet për të legjitimuar të njëjtën parti dhe të njëjtën qeveri; pa pluralizëm politik, pa shtet ligjor, pa mbrojtje të të drejtave të njeriut”, potencoi ai.
“Serbia kërkon statusin e ‘Rusisë së vogël’ në Ballkan, ku entiteti i RS në Bosnje dhe Hercegovinë do të bëhet ‘Bjellorusia e vogël’. Në vitet 1990, Vuçiq mbrojti idenë e një ‘Serbie të madhe’, të cilën ai tani, duke ndjekur shembullin e ‘botës ruse’, e quan ‘bota serbe’”.
Sipas Kurti, Serbia përsëri ëndërron për një “Serbi të madhe”.
“Sot Serbia përsëri ëndërron për një Serbi të madhe; ka pretendime për një pjesë të territorit të shtetit të BeH, dëshiron ta kthejë Malin e Zi në Ukrainë, të na vjedhë veriun e Kosovës. Ajo këmbëngul për një marrëdhënie me fqinjët e saj të ngjashme me marrëdhëniet e Moskës me Ukrainën dhe Bjellorusinë, që nënkupton ose një kontroll të caktuar të qeverisë qendrore ose kontroll të një pjese të caktuar të territorit të vendit fqinj. Prandaj fqinjësia e Serbisë paraqet rrezik sigurie për ne”, tha Kurti./teve1.info/
