Shkruan Dukagjin Rudari
Alain Giresse erdhi me shumë fjalë dhe shumë lëvdata për të na dërguar në “Euro 2024”. Shumë fjalë u thurën nga ata që po mundoheshin që barrën e fajtorit për rezultatet e dobëta ta bartnin te ish-selektori Bernard Challandes.
Futbollist i dalluar, por jo edhe shumë i dëshmuar si trajner, Giresse nuk e besoj se e dinte çfarë e priste në drejtimin e Kosovës.
Ai e filloj detyrën me rezultatet që flasin vetë e nuk duan koment, por ajo që bie në sy është mbrojtja e tij dhe e institucionit ku ai merr pagë nga individë në studio televizive edhe pas dëshpërimit të çdo tifozi e sportdashësi në Kosovë. Rezultatet nuk ishin askund, por për të dhe ata që e sollën thureshin elozhe çdo javë nga njerëz që po përfitonin nga e keqja e Kosovës në të mirë të xhepit të tyre, njerëz “laikë” në futboll, por të zhurmshëm.
Tashmë kur thuhet se Giresse i numëron orët te Kosova dikujt i duhet një pastrim i mëkateve, një ikje nga përgjegjësia, një peshim i tifozëve dhe zërave kundër… e kujt i duhet ajo, besoj e dijmë të gjithë!
Alain Giresse, është “KURBANI”, që do ti marrë valigjet e të largohet, zhurma dhe mbrojtja në studiot televizive nga përfituesit e institucionit të futbollit kosovar do të vazhdojë, zërat për ta kërkuar mëkatbërësin kryesor do të pakësohen.
Por, një gjë është e sigurtë, zgjidhje nuk do të gjejmë me këtë mentalitet të krijuar nga profiterët asnjëherë!
Giresse do ta vazhdoj jetën e tij në Francë, ashtu si Bernard Challandes e të tjerët, por çka krijuan për Kosovën dhe pse nuk arritën ta kenë një bazë lojtarësh e një bazë ekipi… ata nuk duhet fajsuar për gjithçka. Fajtorin e kemi këtu. Në Kosovë!
Mos harroni! Para tri-katër vitesh na thuanin “BRAZILI I BALLKANIT”, “Brazilin” nuk e prishi as Challandes e as Giresse aty kanë dorë shumë të tjerë… dhe nuk janë francezë!
