Babai i gruas që kishte lindur foshnjën, i cili njëkohësisht është edhe punëtor në Spitalin e Përgjithshëm të Pejës – ka folur sot për herë të parë publikisht për rastin që ndodhi në dhjetor të vitit 2022.
Ai tha se stafi spitalor tentoi ta fshihte ngjarjen, ndërkohë që familja nuk dinte asgjë për fatin e trupit të foshnjës së vdekur.
“Kur kemi shkuar për ta marrë trupin e foshnjës, kemi pritur një orë e gjysmë pa asnjë përgjigje. Askush s’na tregoi ku ishte kufoma. Vetëm pas shumë insistimesh, më thanë: ‘Mos u maltreto, hajde merre në orën 12 për varrim’. E kam thirrur sigurimin, por njëri prej tyre doli si i nervozuar dhe u largua. Në ato momente fillova të dyshoja seriozisht”, deklaroi ai pas përfundimit të seancës.
“Kur na e kanë sjellë trupin, ishte copa-copa në një qese. Kemi mbetur të shtangur. Nuk kam parë kurrë një lëshim kaq të rëndë”, shtoi ai.
Sot më 16 prill 2025, në Gjykatën Themelore të Pejës u mbajt shqyrtimi fillestar për rastin e njohur si “Foshnja në lavatriçe”.
Rasti lidhet me vdekjen tragjike të një foshnjeje në Spitalin e Përgjithshëm të Pejës, e cila dyshohet se u fut në lavatriçe bashkë me çarçafë, pas lindjes pa shenja jete.
Hetimet e mëparshme kanë zbuluar se nëna e foshnjës mësoi për ngjarjen nga media, ndërsa familjarët u përballën me refuzimin e spitalit për të dorëzuar trupin e pajetë, çka çoi në zbulimin e incidentit.
Prokuroria dhe Inspektorati Shëndetësor kanë ndërmarrë veprime për të hetuar përgjegjësitë e mundshme të stafit mjekësor.
