Kandidatja e PSD-së për kryetare të Deçanit, Natyra Kuçi, ka akuzuar kryetarin aktual të kësaj komune, Bashkim Ramosaj, për ushtrimin e presionit ndaj votuesve përmes prezencës së tij në qendrat e votimit.
Në një postim në Facebook, Kuçi thekson se Ramosaj është parë në Gllogjan, Irzniq dhe Lumbardh.
“Kryetari në ikje, Bashkim Ramosaj, po i shkel të gjithë kufinjtë e garës demokratike, duke bërë presion përmes prezencës së tij nëqendra të votimit. Bashkë me zyrtarë të tjerë ai është parë në Gllogjan, Irzniq, Lumbardh. Në fotografinë e bashkangjitur duket qartazi, Bashkim Ramosaj në shkollën “Heronjte e Dukagjinit“ në Gllogjan”, ka shkruar ajo në Facebook.
Më tej, Kuçi ka bërë thirrje që prokuroria të ndërmarrë veprime të menjëhershme dhe të marrë masa për të siguruar mbarëvajtjen e zgjedhjeve.
