Drejtori i Institutit Demokratik të Kosovës, Ismet Kryeziu, ka thënë se vendimi i sotëm i KQZ-së për mos certifikimin e Listës Serbe për zgjedhjet parlamentare të 9 shkurtit ka thënë se më shumë duket si vendim i motivuar politik se sa i bazuar në kritere ligjore.
Kryeziu në një reagim në Facebook, ka thënë se vendimi i sotëm është i ngjashëm me vendime të kaluara që ka marrë KQZ-ja e të cilat janë rrëzuar nga PZAP-ja.
“Moscertifikimi i listës Serbe, duket më shumë si vendim i motivuar politikisht sesa i bazuar në kritere ligjore. Ky rast është një ndër disa raste të tilla, kur KQZ-ja ka marrë vendime të ngjashme, por që më vonë janë ndryshuar apo rrëzuar nga PZAP-ja, çka dëshmon mungesën e koherencës dhe profesionalizmit në punën e këtij institucioni. Zyra për Regjistrimin e Partive Politike ka rekomanduar certifikimin e këtij subjekti, duke konstatuar se ai i plotëson kriteret ligjore. KQZ-ja do duhej të mbështetet në këtë rekomandim dhe udhëzimet e institucioneve tjera dhe të veprojë në përputhje me ligjin”, ka shkruar ai ndër të tjera.
