Zëdhënësi i Qeverisë së Kosovës, Përparim Kryeziu tha se nuk janë të kënaqur me daljen e vogël të qytetarëve në zgjedhjet që janë mbajtur më 23 prill në katër komunat veriore.
Kryeziu, tha se përqindja e vogël e qytetarëve për të votuar ka qenë rezultat i kërcënimeve dhe deklaratave nga zyrtarët serbë.
“As ne nuk kemi qenë të kënaqur me daljen e vogël, por ajo dalje e vogël nuk është rezultat i kushteve praktike të pafavorshme, por për shkak të një klime të kërcënimeve dhe rreziqeve që është instaluar nga strukturat ilegale dhe nga deklaratat e presidentit dhe zyrtarëve tjerë serbë”, tha ai në emisionin “Ditari” në Tëvë1.
Për mospjesëmarrjen e Listës Serbe në zgjedhje, që është partia më e madhe, Kryeziu ka thënë se Kosova nuk e ka borxh t’ia jep një mundësi të dytë.
“Ne kemi një situatë të tillë se Lista Serbe ka menduar që kjo është më e mira për ta, dhe ne nuk i kemi borxh t’i japim mundësi të dytë Listës Serbe”
Ndërkohë, për mosbetimin e kryetarëve të rinj të veriut deri më 28 maj, ku edhe ju kalon afati, Kryeziu thotë që do të ishte një ndërhyrje dhe kërkesë jodemokratike.
“Ajo është dhe do të ishte ndërhyrje dhe kërkesë jodemokratike, që Institucionet e Kosovës në mënyrë të vetëdijshme të ndërhyjnë në vullnetin e qytetarëve të shprehen në zgjedhje, në të njëjtën kohë në mënyrë të vullnetshme të stopoj krijimin e institucioneve të cilat pastaj do t’i shërbejnë qytetarëve”, tha ai.
Sipas Kryeziut, shqetësuese edhe për BE-në duhet të jetë fakti që qytetarët që jetojnë në komunat veriore nuk marrin shërbime komunale.
“Më shumë shqetësuese përfshirë edhe BE-në, në këto komuna duhet të jetë fakti që qytetarët në këto komuna nuk marrin shërbime komunale, në mungesë të drejtuesve komunalë”, shtoi ai.
Në zgjedhjet e mbajtura në Leposaviq, Zubin Potok, Zveçan dhe Mitrovicë e Veriut, dy komuna i ka fituar Partia Demokratike e Kosovës dhe dy tjera Lëvizja Vetëvendosje. /teve1.info/
