Rreth draft-statutit të propozuar nga kryeministri i Shqipërisë Edi Rama, është deklaruar Qeveria e Kosovës. Qeveria e Kosovës, është deklaruar për herë të parë pasi Shqipëria ua përcjelli një draft për Asociacionin e komunave me shumicë serbe në Kosovë, presidentit të Francës, Emmanuel Macron dhe kancelarit gjerman, Olaf Scholz.
Zëdhënësi i Qeverisë, Përparim Kryeziu, në një përgjigje me shkrim për RTK-në ka thënë se nga Shqipëria zyrtare presin mbështetje.
“Çështja e kryetarëve të katër komunave në veri të vendit është çështje e respektimit të kushtetutës, sundimit të ligjit dhe ofrimit të shërbimeve ndaj qytetarëve tanë, që për shkak të bojkotit të diktuar nga Serbia u kishin munguar për plot 6 muaj. Çështja e marrëveshjeve të mëhershme për asociacionin e komunave me shumicë serbe është çështje e funksionalitetit të shtetit të Kosovës, dhe kjo u dëshmua me draftin e prezantuar nga Ekipi Menaxhues që drejtohej nga deputetja e Vuçiqit që synonte një Republika Srbska në Kosovë dhe së fundmi me Non-paperin e Akademisë së Shkencave dhe e Artit e Serbisë që flet për ‘Botën Serbe’”, tha Përparim Kryeziu, zëdhënës në Qeverinë e Kosovës.
“Në të dy rastet në pyetje është Kosova. Në të dy rastet rreziku është Serbia. Ata që janë të lirë në qëndrime dhe pa ndonjë ngarkesë, e kuptojnë këtë. Nga Shqipëria zyrtare presim mbështetje. Ndërmjetësues kemi shumë. Çështja e kryetarëve të katër komunave në veri të vendit është çështje e respektimit të kushtetutës, sundimit të ligjit dhe ofrimit të shërbimeve ndaj qytetarëve tanë, që për shkak të bojkotit të diktuar nga Serbia u kishin munguar për plot 6 muaj”, shtoi ai.
Për analistin e çështjeve politike, Dorajet Imeri, dokumenti i dërguar nga Edi Rama për Asociacionin, nuk mund të kualifikohet nëse është i mirë apo i keq, për aq kohë sa nuk dihet përmbajtja.
“Për aq kohë sa ne nuk e dimë përmbajtjen e tij është vështirë që të japim një konstatim mirë apo keq. Ne mund të flasim për legjitimitetin është dashur apo jo dhe cili është realisht pozicioni i Shqipërisë në raportin Kosovë-Serbi. Është një çështje që do dalë komplet në një rrafsh tjetër por për aq kohë sa një dokument i tillë shihet kaq serioz nga akterët e bashkësisë Ndërkombëtare, në veçanti Franca dhe Gjermania unë kam një bindje të plotë që po flasim për diçka që është tepër e koordinuar dhe sigurisht që ajo pavarësisht mund ta ketë firmën e Shqipërisë si propozuese e saj unë kam një bindje të plotë që kjo del projektit shqiptar, për çka në këtë fazë nuk mund të supozoj se çfarë është”, tha analisti politik, Dorajet Imeri.
Për draftin e Asociacionit të propozuar nga kryeministri shqiptar, Edi Rama pati reagime të shumta në Prishtinë e Tiranë.
Opozita në Shqipëri reagoi ashpër duke shkuar madje deri në atë stad sa ta cilësojë si tekst të shkruar në Beograd. Ndërkohë që mbështetjen më të madhe ky draft e mori në Kosovë nga PDK ku njëri prej deputetëve të saj i cili tha ta ketë parë e vlerësoi si draft të mirë.
