Një ditë pas largimit të Afrim Tovërlanit, i cili mori drejtimin e Prishtinës, Federata e Futbollit të Kosovës, ka emëruar pasuesin e tij te Kombëtarja U21.
Ish-futbollistit të Kosovës, Hekuran Kryeziut i është besuar posti i selektorit te Kosova U21, të cilin e ka mbajtur Tovërlani.
Tovërlani të mërkurën u prezantua te Prishtina dhe njoftoi largimin nga Kosova U21 edhe pse kishte kontratë me FFK-në deri në fund të këtij viti.
Federata në njoftimin e saj, bëri të ditur se ka liruar Tovërlanin nga detyra me kërkesë të tij dhe marrëveshje të dyanshme, duke shtuar se postin e zëvendësit të tij, ia ka besuar Kryeziut.
Kryeziu deri më tani ishte ndihmës i Tovërlanit kurse si futbollist ka pasur një karrierë të bujshme, jo vetëm në nivel klubesh por edhe te Kombëtarja e Kosovës.
32-vjeçari do ta vazhdojë punën te Kosova U21 me pjesën tjetër të stafit në tentim për të siguruar kualifikimin në Evropianin e vitit 2027.
Kryeziu ka regjistruar 29 paraqitje me Kombëtaren e Kosovës, për të cilën debutoi në qershor të vitit 2016.
