Kryetarja e partisë së re në Maqedoninë e Veriut, “Lëvizja Qytetare Evropiane”, Gjyla Çeliku thotë se si qytetare e atij vendi është e pakënaqur me përfaqësimin e grave atje si dhe me opozitën.
“Unë kam pakënaqësitë e mia si qytetare e Republikës së Maqedonisë-si dardane, duke parë heshtjen e zërit të gruas në Republikën e Maqedonisë së Veriut dhe hyrjet e daljet në qeveri, fatkeqësisht dhe realisht nuk ka më një opozitë në Maqedoni të Veriut. Ishte Alternativa, tash po del Alternativa po hyn Aleanca dhe paraprakisht ishte Besa, pastaj në zgjedhjet lokale u tërhoq, ku ngeli opozita-ku ngeli opozitarizmi?”, u shpreh ajo.
Sipas saj, përfaqësimi i shqiptarëve në Maqedoninë e Veriut kontrollohet nga politikani, Ali Ahmeti, të cilin e ka quajtur “baba plak”.
“Realisht ne jemi transformuar në vetëdiktatorial, është transformuar në një humnerë politike të kontrolluar nga një ‘baba plak’, i cili thotë hynë dhe dil Qamil”, shtoi Çeliku.
Sipas saj, Ahmeti i menaxhon edhe partitë tjera që s’janë të tij.
“Po, normalisht. Përderisa e harrojnë popullin dhe i bashkohen diktaturës janë paterica të tij”, u shpreh ajo në emisioni “Ditari” në Tëvë1.
Çeliku tregon se nismës së saj i janë bashkuar ish-studentët e saj të profileve të ndryshme.
“Në këtë mision u bashkuan ish-studentët e mi të cilët janë magjistra të shkencave politike janë politologë dhe janë atdhetarë të moralshëm kombëtar, profesionistë dhe janë të gjithë të rinj”, thotë ajo.
Ajo tregon se partia e saj misionin dhe synimin e ka përfshirjen e gjeneratave të reja, gratë, njerëzit me nevoja të veçanta, të varfëritë, intelektualët, sepse të gjithë këta nuk janë të përfshirë në parti që janë 20 vjet në qeveri.
Ajo thotë se është e gatshme të garojë në zgjedhjet e ardhme në Maqedoninë e Veriut.
Tutje, kryetarja e partisë “Lëvizja Qytetare Evropiane” tregon që nuk ka kontakt dhe nuk komunikon me asnjë person të partive tjera politike në Maqedoninë e Veriut.
“Absolutisht, aktualisht me asnjë parti politike. Ne jemi parti multietnike, jemi parti qytetare-evropiane. Nëse ata duan të komunikojnë me mua, unë këtu jam. Ne si parti e kemi drejtimin tonë, e kemi udhën tonë, e kemi orientimin tonë”, shtoi ajo.
