Kryetari i Komunës së Zveçanit, Ilir Peci si dhe kryetari i komunës së Zubin Putokut, Izmir Zeqiri i janë përgjigjur pozitivisht thirrjes së kryeministrit Kurti për ta ushtruar detyrën në objektet zyrtare. Megjithatë ata shprehen të pakënaqur për mënyrën se si shefi ekzekutivit kosovar po komunikon me ta.
Po bëhet gati një vit që prej se në këtë objekt për komunitete në fshatin Lipë po kryen detyrën i pari i Zveçanit.
Por, punën Ilir Peci shumë shpejt do ta vazhdoj nga Objekti Komunal, veçse po pret që zyra e tij të bëhet gati meqë aty nuk ka qëndruar askush që disa muaj.
“Po bëhen përgatitjet e fundit për të lëvizur atje. Gjatë vitit të fundit nuk ka qëndruar askush aty përveç policisë së Kosovës dhe KFOR-it andaj objekti nuk ka qenë funksional. Po presim që të pastrohet objekti dhe ne më pas do të shpërngulemi atje”, tha kryetari i Komunës së Zveçanit, Ilir Peci.
Një dëshirë të tillë për zhvendosje në objekte komunale e ka edhe kryeministri i Kosovës.
Madje, ai pak orë pasi dështoi votimi për shkarkimin e kryetarëve shqiptarë përmes rrjetit social facebook, i bëri thirrje dy kryetarëve shqiptarë që ta ushtrojnë detyrën në objektet zyrtare të komunave të Republikës së Kosovës.
Por, Peci thotë se akoma nuk ka pranuar një ftesë zyrtare nga shefi i ekzekutivit kosovar për të diskutuar lidhur me këtë çështje.
Të njëjtin qëndrim e ka edhe kryetari tjetër Izmir Zeqiri.
“Një pjesë e stafit veçse ka funksionuar ne objektin komunal por në ditët në vijim edhe unë pres që të shkoj atje vetëm se ka nevojë për pak renovime tek disa zyre. Po e them edhe njëherë se atje ka qëndruar një pjesë e kabinetit tim”, deklaroi kryetari i Komunës së Zubin Potokut, Izmir Zeqiri.
Por atyre nuk po i pëlqen mënyra se si kryeministri Kurti po komunikon ta.
Kryetarët shqiptarë të komunave në veri i morën mandatet në maj të vitit të kaluar.