Pas qëndrimit të Listës Serbe se nuk do të marrin pjesë në votimin për shkarkimin e kryetarëve shqiptarë të katër komunave me shumicë serbe në veri të Kosovës janë ngritur dyshime se votimi i 21 prillit do të jetë i suksesshëm. Sipas monitoruesve të proceseve zgjedhore, qytetarët serbë në veri pritet t’i binden thirrjeve të partisë më të madhe të serbëve në Kosovë, rrjedhimisht do të mbesin në detyrë kryetarët aktualë.
Në rast të dështimit, sipas Udhëzimit Administrativ të MAPL-së, peticion të ri për shkarkimin e kryetarëve mund të ketë vetëm pas 12 muajve, kur edhe mbahen zgjedhjet e rregullta lokale.
Hulumtuesi në Institutin Demokratik të Kosovës (KDI), Eugen Cakolli, thotë për KP, se paralajmërimi për bojkot i Listës Serbe është i çuditshëm, duke marrë parasysh se kjo parti kishte marrë pjesë në sigurimin e 20 për qind të nënshkrimeve për të nisur procedurën për shkarkimin e kryetarëve në veri.
Sipas tij, Lista Serbe e ka parë se s’ka vullnet të mjaftueshme të qytetarëve në veri për të dalë në votim, andaj po tenton që i njëjti mos të dështojë për shkak të mosdaljes së komunitetit serb, por në një mënyrë t’i atribuohet faji institucioneve kosovare se është e pamundur të arrihet 50 për qind plus një votë e trupës elektorale që të shkarkohen kryetarët.
“Ka qenë e çuditshme sesi Lista Serbe si subjekt që fillimisht kishte kontribuar drejtpërdrejtë në arritjen e 20 për qind të nënshkrimeve të qytetarëve për peticionin për largimin e kryetarëve, papritmas vendosi që mos të marrë pjesë duke u thirrur në arsye dhe krijimin e të gjitha kushteve për të mos qenë i suksesshëm, derisa po flasim për mbledhje të nënshkrimeve para pak jave kur situata ka qenë e njëjtë. Nëse kanë qenë arsyet që janë përmendur zyrtarisht, atëherë është e çuditshme pse është marrë iniciativa si e tillë. Në anën tjetër unë besoj që ka gjasa që mos të ketë dalje të mjaftueshme të qytetarëve, me këtë rast është tentuar që mos të dështojë për shkak të mosdaljes së komunitetit serb, por në një mënyrë të tentohet që kjo t’i atribuohet institucioneve tona”, thotë Cakolli.
Të dështuar procesin e votimit të 21 prillit e konsideron edhe profesori universitar, Kadri Kryeziu, i cili thotë se vetëm dorëheqjet e kryetarëve aktualë në veri do të prodhojnë zgjedhje të reja atje.
“Me dashtë me zgjidh problemin e veriut në kontekstin e zgjedhjeve ata është dashur që katër kryetarët të japin dorëheqje. Pasi të japin dorëheqje pastaj brenda 45 dite si zgjedhje të jashtëzakonshme do të shpalleshin zgjedhjet…Kjo mënyra tjetër është ligjore por rezultati sipas mendimit tim do të jetë negativ, kështu e shoh se e kam ditë se me kënd kemi punë dhe kam ditë doktrinimin politik të serbëve. Ata në moment të caktuar nëse dëshirojnë me dështu kanë mundësi, nëse nuk dëshirojnë mundësi me dështu po ashtu kanë mundësi. Mentaliteti i tyre është që Kosova të dështojë si shtet”, deklaron Kryeziu.
Në anën tjetër, Cakolli parasheh se kryetarët aktualë në veri do të përfundojnë mandatin e tyre të rregullt deri në fund të vitit 2025.
“Por duke parë tendencën që zgjedhjet mos të mbahen në periudhë dimri atëherë gjasat janë të mëdha që ato të mbahen në shtator të vitit të ardhshëm. Meqenëse zgjedhjet duhet të shpallen katër deri gjashtë muaj para datës për mbajtjen e tyre, atëherë ne shumë lehtë qysh në prill apo më së largu në maj të vitit të ardhshëm do të kemi datën për zgjedhjet lokale të shpallur nga presidentja”, thekson Cakolli.
Pas vendimit të Listës Serbe për bojkot të votimit të 21 prillit, edhe përfaqësuesit e tyre në Komisionit Komunale Zgjedhore kanë dhënë dorëheqje nga këto poste.
Keqardhje për këtë vendim të Listës Serbe kanë shprehur edhe vendet e QUINT-it në Kosovë.
Komisioni Qendror Zgjedhor ka vendosur që votimi për shkarkimin e kryetarëve në veri të mbahen më 21 prill, pasi i verifikoi nënshkrimet e qytetarëve në peticionet që u mblodhën në muajin janar.
