Zyra e Kryeprokurorit të Shtetit ka dënuar ashpër kërcënimin e bërë ndaj prokurorit të Prokurorisë Themelore në Mitrovicë, Muharrem Prekazi, gjatë zhvillimit të një seance gjyqësore.
Në reagimin zyrtar thuhet se çdo tentativë për të frikësuar apo penguar prokurorët e shtetit në ushtrimin e detyrave të tyre zyrtare është e papranueshme dhe nuk do të tolerohet në asnjë formë.
Sipas njoftimit, lidhur me këtë rast janë ndërmarrë menjëherë të gjitha veprimet e nevojshme ligjore ndaj personit përgjegjës, me qëllim që ai të përballet me drejtësinë dhe të marrë dënimin e merituar.
“Zyra e Kryeprokurorit të Shtetit shpreh mbështetjen e plotë institucionale për prokurorin z. Prekazi, si dhe për të gjithë prokurorët e shtetit, të cilët me integritet, profesionalizëm dhe pavarësi ushtrojnë detyrat e tyre ligjore dhe kushtetuese në funksion të forcimit të sundimit të ligjit”, thuhet në reagim.
