“Dua ta shoh edhe themelimin e Asociacionit të komunave me shumicë serbe, por me koordinim të atyre zonave”, deklaroi kështu, Kryeministri i Irlandës, Leo Varadkar.
Homologu irlandez në një konferencë të përbashkët me kryeministrin e vendit, Albin Kurti, bëri të ditur se qeveria e tij vlerëson që kufizimet e vëna mbi Kosovën, duhet të hiqen patjetër.
“Qëndrimi i Qeverisë irlandeze që besojmë se masat kufizuese të vendosura mbi Kosovën, duhet të hiqen. Dua ta shoh edhe themelimin e Asociacionit, por duhet të bëhet me koordinim të atyre zonave dhe s’dua të shoh të bëhet një mikroshtet brenda Kosovës, sepse kjo s’do të jetë e dobishme për të ardhmen”, potencoi Varadkar para mediave.
Madje, Varadkar tha se vendi i duhur i Kosovës është brenda Bashkimit Evropian, me ç’rast u shpreh optimist se një gjë e tillë mund të ndodhë shumë shpejt, shkruan teve1.info.
“Shpresoj që ky të jetë viti ku Kosova të bashkëngjitet në Këshillin e Evropës dhe mandej të bëjmë përparime drejt anëtarësimit në Bashkimin Evropian. Qeveria irlandeze dhe sistemi irlandez, është në dispozicion për Kosovën dhe administratën e saj, që t’i ndihmojmë sa më shumë që të mundemi. Vendi i duhur i Kosovës brenda Bashkimit Evropian, andaj shpresojmë që kjo të ndodhë në një të ardhme jo aq të largët”, shtoi tutje kryeministri holandez.
Kryeministri i Irlandës, Leo Varadkar, ka arritur mbrëmjen e së mërkurës në Kosovë për një vizitë shtetërore, gjersa është pritur në aeroport nga kryeministri i vendit, Albin Kurti./teve1.info/.
