Shefja e Grupit Parlamentar të Lëvizjes Vetëvendosje, Arbërie Nagavci, ka folur për kritikat dhe gjetjet e Raportit të Progresit të Komisionit Evropian, si dhe për hapat që Qeveria do të ndërmarrë për adresimin e tyre.
Në një intervistë në emisionin “Ditari” në Tëvë1, Nagavci ka thënë se raporti është analizuar me kujdes në të gjitha fushat, duke pranuar se bllokada institucionale ka ndikuar në ngadalësimin e reformave dhe të progresit në vend.
Ajo ka theksuar se raporti pasqyron një periudhë të vështirë institucionale, gjatë së cilës Kosova ka funksionuar pa institucione të plota dhe me një Qeveri në detyrë, Kuvend jofunksional dhe Presidencë në detyrë për disa muaj.
“Raportin e kemi analizuar me kujdes, në të gjitha fushat. Është e rëndësishme të përmendet edhe ajo që vetë është theksuar në raport, se nuk ka kthim prapa. Ndonëse bllokada institucionale ka qenë evidente dhe më e gjatë se asnjëherë më parë, ky raport vjen në një kohë kur ne kemi qenë pa institucione funksionale, me Qeverinë në detyrë, Kuvendin jofunksional dhe për disa muaj edhe me Presidenten në detyrë. Kjo ka ndikuar në ngadalësimin e reformave dhe në mungesën e progresit të pritur”, ka deklaruar Nagavci.
Ajo ka thënë se, pavarësisht vështirësive dhe periudhës së gjatë të bllokadës institucionale, institucionet tashmë janë duke vazhduar punën për të përshpejtuar proceset reformuese.
Sipas saj, projektligjet dhe reformat që janë në interes të qytetarëve po trajtohen me ritëm më të shpejtë në Kuvend, gjë që, sipas saj, përbën një arsye për optimizëm.
“Sa u përket projektligjeve dhe reformave që janë në interes të qytetarëve, ne po vazhdojmë punën me ritëm të përshpejtuar, si në Kuvend, ashtu edhe në shqyrtimin e projektligjeve dhe avancimin e reformave. Kjo është diçka që na mban optimistë”, ka thënë Nagavci.
