Kryediplomati polak që njëherësh është edhe kryesues i OSBE-së, u takoi vec e vec me liderët shtetërore.
Në takim me presidenten mediet u lejuan të marrin vetëm pamje.
Po ashtu larg medieve takoi edhe kryeministrin Albin Kurtin, e kryeparlamentarin Glauk Konjufca.
Se çfarë u diskutua mediat e morën vesh vetëm nga komunikatat për media dhe shkrimet në rrjetet sociale.
“Në takim me ministrin e Jashtëm të Polonisë, Zbignieë Rau, i cili po viziton Kosovën edhe si kryesues aktual i OSBE-së, diskutuam për rolin e OSBE-së në mbështetjen e institucioneve të Republikës përgjatë dy dekadave të fundit, si dhe për zhvillimet e fundit të sigurisë në rajon dhe më gjerë”, thuhet në njoftimin e Presidences.
“Në takim u diskutua për avancimin e plotë të marrëdhënieve diplomatike ndërmjet dy shteteve, si dhe paqen e sigurinë në rajon dhe Evropë”, thuhet në njoftimin e Zyrës së kryeministrit Kurti.
“U shkëmbyen mendime rreth punës së legjislativit, progresit që ka shënuar Kosova me ndërmarrjen e reformave në fushën e sundimit të ligjit, lirisë së shprehjes, demokracisë, sistemit zgjedhor dhe të drejtave të njeriut, si dhe bashkëpunimin e Kuvendit me misionin OSBE-së në Kosovë”, thuhet në komunikatën për media të Kuvendit të Kosovës.
Pas takimeve me liderë politikë, ministri polak ka thënë se qëllimi i vizitës së tij në Kosovë ka qenë të informohet rreth reformave në fushën e gjyqësorit, luftën kundër korrupsionit, lirinë e mediave dhe avancimit të reformës zgjedhore.
“Kemi diskutuar për mënyra të ndryshme në të cilat OSBE mund të ofrojë ndihmën e saj përmes operacioneve në terren, pranisë së saj në terren. OSBE kontribuon në zhvillimin e mëtejmë të një shoqërie demokratike dhe shumë-etnike. Shpresoj sinqerisht që kjo do të kontribuojë në stabilitetin dhe pajtimin në Evropën Juglindore”, ka thënë ai gjatë një deklarate për media.
Ministri polak ka takuar edhe kryesuesin e Komisionit Qendror të zgjedhjeve dhe aktivistë të shoqërisë civile.
