Kryediplomati belg mbështet maksimalisht anëtarësimin e Kosovës në Këshill të Evropës
Zbarkoi në Prishtinë për një vizitë zyrtare.
E i pari që e mirëpriti këtë të enjte kryediplomatin belg, ishte kryeministri Kurti.
Me t’u takuar para objektit të Qeverisë, nuk mungoi as një shtrëngim duarsh.
Takimi zgjati rreth një orë.
E me të përfunduar, zyra e Kryeministrit përmes një komunikate tregoi se çka u bisedua.
“Kryeministri Kurti tha se Brukseli, si kryeqytet i trefishtë, është qendër tejet e rëndësishme për Republikën e Kosovës. Ai theksoi se anëtarësimi në Bashkimin Evropian është prioritet i yni strategjik dhe avancimi i aplikimit, nëpërmjet dhënies së statusit të shtetit kandidat, duhet të jetë hapi i radhës në këtë drejtim. Krahas kësaj, ai tha se Republika e Kosovës është e përcaktuar qartë, e angazhuar dhe e përkushtuar për anëtarësim në Këshillin e Evropës dhe në NATO”, thuhet nga ZKM.
Nga këtu, destinacioni i radhës i Maxime Prevot, ishte në zyrën e homologut të tij kosovar, Glauk Konjufca.
Menjëherë brenda filluan takimin me delegacionet.
Pas takimit, dolën në foltore për të treguar se çka diskutuan.
“Në fushën e politikës së jashtme, Belgjika është një nga partnerët më të rëndësishëm brenda Bashkimit Evropian dhe në këtë frymë ia shpreha vlerësimin tim më të lartë zëvendëskryeministrit Prévot për mbështetjen e tyre gjatë procesit për heqjen e masave të BE-së ndaj Kosovës, që ishte një hap shumë i rëndësishëm përpara në aspiratat tona evropiane”, u shpreh Konjufca.
Në drejtim të homologut të tij, Konjufca e pati edhe një kërkesë tjetër për mbështetje.
“Mbështetja që ka dhënë Belgjika në proceset integruese të Kosovës deri më tani ka qenë shumë e rëndësishme dhe presim që kjo të vazhdojë edhe në fazat e ardhshme, si drejt Këshillit të Evropës, ashtu edhe në qartësimin e rrugës sonë drejt Bashkimit Evropian”, tha ai.
Përgjigje mori menjëherë nga Prevot.
“Duke folur për Këshillin e Evropës, në mënyrë aktive do të avokojë për anëtarësimin tuaj, jo në të ardhmen, por tani është koha. Belgjika mbetet e përkushtuar që të fuqizojë dialogun bilateral dhe të thellojë bashkëpunimin, veçanërisht duke pasur parasysh rëndësinë e diasporës kosovare në Belgjikë”, tha kryediplomati belg.
Ai shkurt foli edhe për dialogun mes Kosovës dhe Serbisë të ndërmjetësuar nga BE-ja.
“Belgjika mbështet plotësisht dialogun e ndërmjetësuar nga BE. Angazhimi i vazhdueshëm dhe progresi i prekshëm i marrëveshjeve janë të domosdoshme për stabilitetin rajonal dhe të ardhmen evropiane të Kosovës”, tha Prevot.
Dialogu Kosovë – Serbi ishte temë diskutimi edhe mbrëmë mes kryeministrit Kurti dhe emisarit të BE-së, Peter Sorensen, në një darkë pune.
