Trajneri i Kroacisë, Zlatko Daliq ka paralajmëruar ndryshime në formacion për ndeshjen kundër Shqipërisë.
Mediumet kroate kanë bërë të ditur se Daliq ka marrë vendim që të paraqitet me formacionin 4-2-3-1 për duelin me Shqipërinë, i cili luhet të mërkurën prej orës 15:00.
Këtë vendim trajneri kroat e ka marrë pas humbjes 3:0 nga Spanja në ndeshjen e parë. Me Spanjën, Kroacia u paraqit me formacionin 4-3-3, ku mesfusha përbëhej nga treshja Luka Modriq, Mateo Kovaçiq e Marcelo Brozoviq.
Megjithatë, Brozoviq ndaj Shqipërisë do të jetë në stol pasi Modriq e Kovaçiq do të jenë në mesfushë, ndërsa në krah do të aktivizohet Ivan Perishiq që nuk ishte titullar me Spanjën.
Perishiq së bashku me Andrej Kramariqin e Lovro Majerin do të përkrahin nga prapa sulmuesin e vetëm, Ante Budimir.
Ndryshime do të ketë edhe në mbrojtje, ku Joshko Gvardiol do të zhvendoset në qendër pasi me Spanjën u aktivizua si mbrojtës i krahut të majtë.
