Për gati 60 ditë, asnjë ushqim, karburant apo ilaç nuk ka hyrë në Rripin e Gazës, të bllokuar nga Izraeli.
Kjo në një kohë kur grupeve të ndihmës në enklavë po u mbarojnë ushqimet të cilat i kanë për t’i shpërndarë.
Tregjet pothuajse janë zbrazur e familjet palestineze po luftojnë për të ushqyer fëmijët e tyre.
“Kam frikë se do të vdesim nga uria. Harruam mishin, harruam pulën, harruam gjithçka. Dhe kam frikë se mos u ndodh diçka fëmijëve të djalit tim nga mungesa e ushqimit”, Sumaya al-Najjar – banore.
Rreth 2.3 milionë palestinezë në Gaza tani jetojnë kryesisht me perime të konservuara, oriz, makarona dhe thjerrëza.
Ato pak perime apo artikuj të tjerë që gjenden në treg janë shtrenjtuar, duke e bërë situatën të papërballueshme për shumicën.
“Nuk gjej gjë për të blerë, edhe kur i gjej janë shumë shtrenjtë. Jemi nëntë anëtarë në familje, si mund t’i ushqej të gjithë?”, tha banori tjetër, Khalil Abu Ghraeieb.
Izraeli vendosi bllokadën për ndihmat humanitare në enklavë më 2 mars dhe më pas prishi një armëpushim dy mujor duke rifilluar operacionet ushtarake më 18 mars.
Grupet e të drejtave të njeriut e quajnë bllokadën një “taktikë urie” që rrezikon të gjithë popullsinë dhe një krim të mundshëm lufte.
Trupat izraelite kanë shkatërruar shumicën dërrmuese të tokave bujqësore dhe serave të territorit ose i kanë mbyllur ato brenda zonave ushtarake ku kushdo që afrohet rrezikon të qëllohet.
Izraeli ka rrafshuar pjesën më të madhe të Gazës me fushatën e tij ajrore dhe tokësore, duke u zotuar të shkatërrojë Hamasin pas sulmit të tij më 7 tetor 2023 në Izraelin jugor.
Mbi 51,000 palestinezë, kryesisht gra dhe fëmijë, janë vrarë në Gaza që nga fillimi i luftës, sipas Ministrisë së Shëndetësisë të Gazës.
