Presidenti i Federatës së Futbollit të Kosovës (FFK), Agim Ademi nëpërmjet një postimi në Facebook ka reaguar pas dy miqësoreve që Kombëtarja e Kosovës i pati këtë muaj.
Kosova, të premten e shkuar mposhti Armeninë 1:0 në Yerevan, ndërsa të martën mbrëma pësoi 2:0 nga Hungarian ë Budapest.
Në postimin e tij, Ademi tha se Kosova pati paraqitje të mirë ndaj Hungarisë, ku lojtarët u angazhuan maksimalisht dhe përfaqësuan vendin e tyre ashtu siç u ka hije. Duelet me Armeninë e Hungarinë, shtoi se ishin miqësore ku të gjithë futbollistëve pothuajse i është dhënë mundësia dhe hapësira.
“Këto ndeshje ishin në shërbim të trajnerit Foda, i cili po punon që të krijoj një ekip kompakt e të bashkuar në fushë dhe jashtë saj. Kjo po ndërtohet dhe Kosova po rikthehet. Vërtet humbëm nga HUngaria, por edhe u dëshmua puna e mirë e selektorit Foda dhe stafit të tij”, ka shkruar Ademi.
Gjithashtu, Ademi shtoi se numri i madh i shikuseve në “Puskas Arena” në Budapest është dëshmi se sa lart u vlërësua dhe u respektua Kombëtarja e Kosovës.
“Besoj në këtë ekip dhe në kualitetin e tyre. Jemi në rrugë të mbarë dhe shumë me fat që kemi futbollistë të talentuar. Në ndeshjet tjera do të shohim edhe talente të tjerë të spikatur”, vazhdoi ai.
Postimin e tij, Ademi e mbylli me fjalët se krahas lojtarëve si Albion Rrahmani, Lumbardh Dellova, Ilir Krasniqi, Drilon Hazrollaj e Lindon Emërrlahu, te Kosova do të ketë edhe prurje të reja nga Superliga e Kosovës, të cilët tashmë janë në radarin e selektorit Foda.
