Përgatitjet e fundit po bëheshin gati, pasi edhe vizita është e rëndësishme.
Gra të profesioneve të ndryshme po e prisnin në tepihun e kuq presidenten e vendit Vjosa Osmani.
E para e vendit u prit nga i pari i komunës së Drenasit, Ramiz Lladrovci.
Një përqafim më të ngrohtë presidentja e pati me disa vajza të vogla të veshura me veshje kombëtare.
Shefja e shteti, komunën e Drenasit e vizitoi në kuadër të ciklit të takimeve në komunat e Kosovës, ku thurri lavde për kontributin e grave të këtij qyteti si dhe punën e kësaj komune.
Në konferencën për media presidentja Osmani u pyet për qëndrimin e saj për reagimet e shteteve të QUINT për vendimin e shpronësimit të pronave në veri.
“Çështja e shpronësimeve ka rregulla të caktuara dhe këto rregulla jo vetëm që përcaktohen me ligje tona por edhe me standardet evropiane të Gjykatës Evropiane për të Drejtat e Njeriut, për aq sa respektohen këto standarde është një test pesë hapësh i i paraparë nga vendimet e Gjykatës Evropiane për të Drejtat e Njeriut përderisa respektohet ky standard dhe pesë hapat janë aplikuar kjo tregon se është zbatuar edhe ligji ynë edhe kërkesat tona Kushtetuese edhe standardet evropiane të drejtave të njeriut dhe shpronesimet vazhdojnë në përputhje me ligjin pa asnjë tendencë për diskriminim të askujt”, tha Osmani.
Lidhur me idenë e prezantuar nga kryeministrit Kurti, që emisari sllovak, Miroslav Lajçak ta dërgojë në Komision të Venecias Draftin e BE për Asociacionin, presidentja ka thënë se një ide e tillë nuk është prezantuar zyrtarisht.
“Idetë që prezantohen në media nuk mund t’i shoh si formalisht të prezantuara, ju e dini që sipas Kushtetutës përcaktimi i objektivave të politikës së jashtëm bëhet nga kreu i shtetit, kurdo që prezantohet një ide e tillë do të shqyrtoj por mendoj që çdo mundësi të analizohet vetëm në kontekst të interesave të RKS dhe qytetarëve të saj”, tha presidentja e vendit.
Gjatë qëndrimit në Drenas, presidentja ka vizituar Parkun e Biznesit dhe shkollën “Xhevë Lladrovci”, në Gllanasellë.
