Krasniqi tutje deklaroi se Qeveria Kurti nuk mund t’i marrë meritat për liberalizimin e vizave, pasi siç tha ajo, Kosova ka përmbushur kriteret që nga viti 2018.
“Unë jam shumë optimiste që ky proces të përfundojë me sukses. Nesër është takimi ku Kosova për herë të parë është në agjendën e grupit punues për liberalizimin e vizave. Kosova ka plotësuar kriteret për liberalizim të vizave që nga viti 2018. Kjo është thënë edhe sot në Raportin e Progresit që presin ky proces të përfundojë me sukses pasi që jemi vendi i vetëm në rajon që i kemi plotësuar kriteret më shumë se të gjitha vendet tjera. Është padrejtësi e madhe që i është bërë Kosovës deri më tani. Nuk është që Qeveria ka bërë aq shumë punë që këto procese të përfundojnë sa më shpejt. Pra, nuk është kjo Qeveri për t’i marrë të gjitha meritat për procesin e liberalizmit të vizave”, tha Krasniqi në emisionin “Infonata”.
Mirëpo sipas saj, e tërë kjo situatë ka ndryshuar për shkak të invazionit rus në Ukrainë. Teksa shtoi se Bashkimi Evropian tanimë e ka kuptuar sa e rëndësishme është që shtetet tjera t’i përkrahin vendimet e tyre.
Këshilli Evropian të enjten nis procedurat që mund të çojnë në një vendim formal për liberalizimin e vizave për Kosovën. Çështja e lëvizjes së lirë për kosovarët do të jetë në rend dite në diskutimin e parë të grupit punues të Këshillit të BE-së./Tëvë1.info/
