Kryetari i Partisë Demokratike të Kosovës, Memli Krasniqi ka zhvilluar takime të ndara me të n ngarkuarën me punë në ambasadën amerikane në Kosovë, Anu Prattipati dhe ambasadorin e Mbretërisë së Bashkuar në Kosovë, Jonathan Hargreaves.
Në këto takime siç ka njoftuar Krasniqi është diskutuar për zhvillimet aktuale dhe nevojën e krijimin e institucioneve të reja.
“Në frymën e diskutimit për zhvillimit aktuale, theksova nevojën që institucionet e reja të themelohen sa më parë, sepse vonesat po krijojnë pasiguri dhe po dëmtojnë funksionimin normal të shtetit. PDK do të vazhdojë të veprojë me përgjegjësi, në interes të qytetarëve, për stabilitet institucional dhe mbetet e përkushtuar për partneritet të ngushtë me Shtetet e Bashkuara dhe aleatët tanë perëndimorë”, ka shkruar ai për takimin me Prattipatin.
Krijimi i institucioneve të reja ishte temë diskutimi edhe me ambasadorin britanik.
“Diskutuam për situatën politike në vend, zhvillimet paszgjedhore dhe nevojën urgjente për funksionalizimin e institucioneve të reja, në përputhje me Kushtetutën. Me Ambasadorin Hargreaves ndava shqetësimet tona për bllokadën aktuale institucionale, e cila po e dëmton besimin e qytetarëve dhe po pengon zhvillimin demokratik të vendit”, ka shkruar Krasniqi.
