Zyra Kombëtare e Auditimit (ZKA) ka njoftuar se ka realizuar auditimin e performancës “Funksionimi, licencimi dhe mbikëqyrja e Institucioneve Parashkollore” për përiudhën 2022–2024.
Sipas ZKA-së gjatë auditivit të kësaj performance janë evidentuar mangësi në procesin e licencimit, mbikëqyrjes dhe monitorimit të institucioneve parashkollore.
“Auditimi ka vlerësuar organizimin e procesit të edukimit në fëmijërinë e hershme, shfrytëzimin dhe zhvillimin e kapaciteteve si dhe mbikëqyrjen dhe monitorimin e institucioneve parashkollore”, thuhet në njoftim.
Subjekt i këtij auditimi thuhet se ishin Ministria e Arsimit Shkencës Teknologjisë dhe Inovacionit (MASHTI), si dhe Drejtoritë Komunale të Arsimit në Prishtinë, Prizren dhe Gjakovë.
“Rezultatet e auditimit tregojnë se pavarësisht iniciativave dhe përpjekjeve për të avancuar edukimin në fëmijërinë e hershme, sistemi aktual përballet me sfida. Ka mungesë të infrastrukturës ligjore sekondare, si dhe të mekanizmave funksional për monitorim dhe licencim”, theksohet në njoftim.
Tutje, është evidentuar se MASHTI nuk ka arritur të vendosë një proces efektiv për funksionimin dhe mbikëqyrjen e institucioneve parashkollore.
“Ministria nuk ka siguruar një proces të rregullt, të drejtë dhe të barabartë të licencimit të institucioneve parashkollore”, nënvizohet tutje në njoftim.
Ndërkohë, ZKA-ja thotë se në nivel lokal, përkundër disa përparimeve në ndërtimin e objekteve dhe monitorim të pjesshëm, mungesa e planeve zhvillimore, rregulloreve të funksionimit dhe përfshirjes së plotë të grupmoshave e pengon funksionimin e qëndrueshëm dhe cilësor të institucioneve parashkollore.
“Lidhur me këtë auditim, auditorja e Përgjithshme, Vlora Spanca, ka deklaruar se proceset për funksionimin dhe licencimin e institucioneve parashkollore nuk janë efektive dhe nuk sigurojnë zhvillimin e duhur. Zyra Kombëtare e Auditimit ka dhënë tetë rekomandime për përmirësimet e nevojshme në nivelin e edukimit parashkollor”, thuhet në njoftimin e ZKA-së./teve1.info/
