Ministri i Administrimit dhe Pushtetit Lokal, Elbert Krasniqi është takuar sot me shefin e OSBE-së në Kosovë, Michael Davenport, shkruan teve1.info.
Krasniqi tha se gjatë këtij takimi diskutuan për zhvillimet e fundit në vend dhe iniciativat e grupeve nismëtare në komunat e Mitrovicës së Veriut, Leposaviqit, Zubin Potokut dhe Zveçanit.
“Me ambasadorin e misionit të OSBE-së në Kosovë, Michael Davenport diskutuam për zhvillimet e fundit në vend dhe iniciativat e grupeve nismëtare në komunat e Mitrovicës së Veriut, Leposaviqit, Zubin Potokut dhe Zveçanit. Ne mbesim të përkushtuar që të ndërmarrim të gjitha veprimet dhe vendimet e nevojshme që vullneti i qytetarëve të realizohet bazuar në udhëzimin administrativ”, tha Krasniqi.
Derisa edhe Davenport në platformën “X” tha se ishte një takim i mirë me ministrin Krasniqi, ku u bisedua për zbatimin e ligjit dhe udhëzimin administrativ për largimin e kryetarëve të komunave.
“Takimi i mirë sot me ministrin Elbert Krasniqin. Diskutuam për zbatimin e ligjit dhe udhëzimin administrativ për largimin e kryetarëve të komunave. Theksova rëndësinë që ky proces të ecë pa probleme, në përputhje me ligjin dhe rregulloret. Ashtu si me zgjedhjet, largimi duhet të jetë i lirë, i drejtë dhe demokratik”, shkroi Davenport./teve1.info./
