Kryetari i PDK-së, Memli Krasniqi ka uruar Izmir Zeqirin dhe Ilir Pecin për fitore në zgjedhjet e sotme në komunat në Zveçan dhe Zubin Potok.
Ai po ashtu ka falënderuar edhe qytetarët të cilët sipas tij, “i besuan PDK-së”, përcjell teve1.info
“Partia Demokratike e Kosovës ka fituar në Zveçan dhe Zubin Potok, në zgjedhjet e sotme lokale për katër komunat e pjesës veriore të vendit. I uroj Ilirin dhe Izmirin për fitoret, por edhe Albulenën e Taulantin për angazhimin dhe punën e palodhshme në komunat ku garuan. Ndërkaq, falënderimi më i madh u takon të gjithë atyre qytetarëve të cilët edhe sot i besuan PDK-së, kandidatëve dhe ofertës tonë”, ka shkruar ai në Facebook.
Krasniqi ka theksuar se është e rëndësishme që procesi i sotëm ka qenë i rregullt dhe i qetë, megjithëse siç thotë ai, është shqetësues fakti që “situata në pjesën veriore ka degraduar, gjë që u pa edhe nga pjesëmarrja e ulët e qytetarëve në zgjedhje”.
Ai po ashtu ka shtuar që tani presin nga Qeveria që të marrë obligimet dhe detyrat për të mundësuar konsolidimin e institucioneve në katër komunat në veri.
“PDK mbetet e përkushtuar dhe e vendosur për të ofruar qeverisje gjithëpërfshirëse për të gjithë qytetarët, pa dallim. Ky ka qenë zotimi ynë – ky është edhe misioni ynë. Bashkë për Kosovën!”, është shprehur tutje Krasniqi.
Komisioni Qendror i Zgjedhjeve ka shpallur rezultatet preliminare të zgjedhjeve të cilat janë mbajtur sot në katër komunat në veri të vendit.
Sipas KQZ-së, në Leposaviq zgjedhjet i ka fituar Lëvizja Vetëvendosje me 73.5%, në Zubin Potok ka fituar Partia Demokratike e Kosovës me 52.1%, në Zveçan ka fituar PDK-ja me 60% dhe në Mitrovicë të Veriut ka fituar LVV-ja me 66.5%. /Teve1.info/
