Ministri i Administrimit të Pushtetit Lokal, Elbert Krasniqi, tha se është në pritje të propozimit të kuvendeve komunale dhe kryetarëve të zgjedhur të komunave veriore, për caktimin e datës së betimit të tyre si kryetarë komunash, raporton teve1.info
Krasniqi tha për Teve1 se ku ka kuvende komunale po pritet propozimi i tyre, derisa në komunat që nuk ka kuvend komunal po pritet propozimi i kryetarëve të zgjedhur në mënyrë që të caktohet data e betimit.
“Po i presim derisa të na vinë propozimet e kuvendeve komunale për caktimin e datës së betimit”, tha ai.
Ndërsa, i pyetur për deklaratën e ambasadorit të SHBA-së në Kosovë, Jeff Hovenier se betimit duhet të bëhet në një vend të qetë, Krasniqi tha se një gjë e tillë është e përcaktuar me Ligjin për Qeverisje Lokale.
“Nuk i kam dëgjuar, nuk mundem me komentu deklaratën, Ligji i Qeverisjes Lokale e parasheh këtë pjesë qartë”, u shpreh ai.
Kryetari i Mitrovicës Veriore Erden Atiq, i cili i fitoi zgjedhjet lokale të 23 prillit në këtë komunë, ka paralajmëruar betimin e tij të premten.
