Kryetari I PDK-së, Memli Krasniqi, tha se në përvjetorin e 53-të të Universitetit të Prishtinës, “Hasan Prishtina”, siç u shpreh, fatkeqësisht sot shumë studentë nuk po e shohin të ardhmen në Kosovë, raporton tëvë1.info
Përmes një statusi në Facebook, Krasniqi u shpreh se rinia dhe studentët ishin kontribuues të idealit për Pavarësinë e Kosovës, derisa shtoi se prioritet i qeverisjes në Kosovë duhet të jetë rikthimi i besimit tek të rinjtë.
“Kur jemi vetëm dy ditë larg nga festimi i 15 vjetorit të Pavarësisë së Kosovës, shprehim mirënjohjen e madhe për të gjitha gjeneratat e profesorëve, asistentëve, studentëve dhe stafit tjetër përbërës të UP-së, për kontributin e çmueshëm drejt përmbushjes së këtij ideali.
Fatkeqësisht, sot, shumë studentë të jashtëzakonshëm nuk po e shohin të ardhmen në Kosovë. Shkaqet tashmë janë të mirënjohura: mundësitë e kufizuara të punësimit, humbja e shpresës dhe mungesa e vizionit qeverisës.
Prandaj, nëse ekziston sot një prioritet për të cilin duhet të përkushtohemi të gjithë – padyshim është rikthimi i besimit tek të rinjtë për të ndërtuar një të ardhme të sigurt dhe të mirëfilltë në vendin tonë”, shkroi ndër të tjera Krasniqi.
Ai tha se ndërtimi i një shteti i cili krijon më shumë mundësi për përmbushjen e potencialit rinor, është i vetmi çelës për të mbajtur rininë në vend.
