Krasniqi thotë se mbi një milion shqiptarë të Kosovës ishin të detyruar që të largoheshin nga shtëpitë e tyre.
Sipas tij, po aq e rëndësishme për Kosovën është edhe drejtësia për viktimat e saj, e cila deri sot, fatkeqësisht, akoma nuk ka ardhur.
“Sot shënojmë Ditën e Eksodit Shqiptar – në kujtim të mbi një milion shqiptarëve të Kosovës që ishin detyruar dhunshëm të largoheshin nga shtëpitë e tyre dhe vendi ynë 23 vite më parë. Është jetike që kjo histori e dhembjes, në përpjekjen tonë për liri, të mos harrohet asnjëherë. Po aq e rëndësishme për Kosovën është edhe drejtësia për viktimat e saj, e cila deri sot, fatkeqësisht, akoma nuk ka ardhur”, ka shkruar ai.
Krasniqi ka shprehur mirënjohje për të gjithë shqiptarët në rajon që hapen dyert e shtëpive të tyre për të strehuar refugjatët nga Kosova.
“Në këtë ditë të kujtesës tonë kolektive, të historisë jo të largët, u shprehim mirënjohjen e thellë të gjithë shqiptarëve në rajon, Shqipëri, Maqedoni e Mal të Zi, që hapën zemrat dhe dyert e shtëpive të tyre, për të strehuar refugjatët nga Kosova. Kosova nuk do të harrojë asnjëherë”, tha më tej ai. /teve1.info/
