Musa Krasniqi nga Partia Fjala ka deklaruar se nëse ky subjekt politik i fiton zgjedhjet, pagën minimale nga 300 euro do ta ngritë afro 400 euro.
Krasniqi tha se pagën prej 400 eurove e kërkon tregu i punës.
“Me Partinë Fjala, paga minimale do të jetë afër 400 euro, ashtu duhet të jetë, sepse ashtu e kërkon tregu i punës. Ndërkohë, Qeveria e tashme ka bë një vendim 350 euro, ndërsa nuk e kanë marrë vendimin me çua pak ma lartë me bë ligj këtë punë”, deklaroi Krasniqi.
Ndërsa, kryetari i kësaj partie politike, Gëzim Kelemendi, tha se një pagë minimale prej 350 eurove është fyerje për dinjitetin njerëzor.
“Me fol për një pagë minimale prej 350 eurove, kjo është fyerje për dinjitetin njerëzor, jo për punëtorin. Punëtori është larguar pa kurrfarë llogaridhënie e është shtypur e drejta e tij, s’ka dinjitet punëtori në sektorin privat. Ne flasim për një pagë në sektorin publik minimalja 350 euro, asnjë qeveri nuk guxon të krekoset për pagën minimale qoftë 350, 400, 500 euro ngase ata po flasin për sektorin publik kryesisht, sektori privat është i shtypur”, deklaroi ai në emisionin “Këndi i Debatit” në Tëvë1.
