Kryetari i Partisë Demokratike të Kosovës, Memli Krasniqi, ka dhënë detaje pas takimit të tre liderëve të opozitës me të dërguarin e SHBA-së për Ballkanin Perëndimor, Gabriel Escobar
Përmes një postimi në Facebook, Krasniqi ka shkruar se gjatë takimit kanë shkëmbyer qëndrimet për zhvillimet aktuale në vend.
Teksa më tej, kreu i PDK-së, ka thënë se komunikimi me aleatët është i domosdoshëm për t’i avancuar interesat e Kosovës.
“Komunikimi me aleatët strategjikë, është jo vetëm i mirëseardhur dhe i frytshëm, por edhe i domosdoshëm për t’i avancuar interesat e Kosovës. Nisur nga ky qëllim, sonte, në rezidencën e ambasadorit Hovenier zhvilluam një darkë pune me të dërguarin e SHBA-së për Ballkanin Perëndimor, Gabriel Escobar. Bashkë shkëmbyem qëndrimet për zhvillimet aktuale politike në vend dhe vizionin për një të ardhme më prosperuese për popullin dhe shtetin tonë”, thuhet në postimin e Krasniqit.
Në përfundim të tekstit, Krasniqi ka shkruar se Kosova çdo fitore dhe çdo sukses në rrugën e çlirimit, e ka arritur me Shtetet e Bashkuara të Amerikës.
“Prandaj, partneriteti ynë është i paalternativë edhe në rrugën e së ardhmes drejt integrimit euro-atlantik”, thuhet në përmbyllje të postimit./teve1.info/.
