Kryetari i Partisë Demokratike të Kosovës, Memli Krasniqi po qëndron në Zvicër, ku ka marrë pjesë në manifestimin e shënimit të 15 vjetorit të shpalljes së Pavarësisë së Kosovës, të organizuar nga Dega e PDK-së në Zvicër.
Duke falënderuar mërgatën për mikpritjen, lideri i PDK-së, Krasniqi tha se është kënaqësi e veçantë të festojë në mesin e tyre, sepse PDK-në dhe bashkatdhetarët para se t’i lidhë politika, i ka lidhur kauza e rrugëtimi i përbashkët për liri.
Krasniqi ftoi bashkatdhetarët që përmes PDK-së të kontribuojnë për ta rikthyer siç ka thënë ai Kosovën në binarët e sigurt të zhvillimit.
Krasniqi përmendi edhe largimin e të rinjve për një jetë më të mirë jashtë Kosovës, si pasojë e keqqeverisjes së Qeverisë Kurti, ku tha se detyra e përbashkët e gjithë spektrit politik është krijimi i një të ardhmeje prosperuese në vend.
“Unë jam kundërshtar politik i Albin Kurtit, por Kosovën e kemi të përbashkët, dhe unë e dua një Kosovë të mirë e prosperuese, pavarësisht pozicioneve politike që kemi sot a nesër. Realiteti i brishtë i periudhës aktuale në Kosovë, që edhe ju e dini dhe po e shihni, nuk lidhet me betejat tona politike ditore, lidhet me gjendjen e rëndë që e ka përfshirë Kosovën, e që fatkeqësisht, është krijuar nga një pushtet totalisht i paaftë për ta ndalë degradimin e mëtutjeshëm. Prandaj, detyra e përgjegjësia jonë e përbashkët, është ta ndalim degradimin e Kosovës dhe ta nisim një rrugë të re, krejt ndryshe prej kësaj aktuales, ka thënë ai thuhet në komunikatën e PDK-së./teve1.info/
