Kryetari i Partisë Demokratike të Kosovës, Memli Krasniqi, tha se zgjedhja e minatorëve për të hyrë në grevë ishte zgjidhja e vetme për shkak të siç tha ai, injorimit të kresave të tyre nga Qeveria tash e dy vjet, raporton teve1.info
Krasniqi përmes një statusi në Fcaebook ka shkruar se tash e 72 orë grevsitët në minierë nuk i ka vizituar as kryeministri e as ministrja e dikasterit, pasi sipas tij, premtimet e tyre për Trepçën kanë qenë vetëm mashtrime.
“Sot, minatorët e Trepçës kanë hyrë në ditën e katërt të grevës. Gjendja e tyre shëndetësore po përkeqësohet shpejt dhe ndjeshëm. Kjo formë e protestës nuk ishte zgjedhje e tyre – por ishte zgjidhja e vetmja për shkak të injorimit të plotë që u ka bërë Qeveria kërkesave të tyre për më shumë se dy vjet. Kërkesat e tyre janë të drejta dhe të domosdoshme – andaj duhet të plotësohen urgjentisht.
Fatkeqësisht, edhe pse kanë kaluar më shumë se 72 orë në grevë, këta qindra minatorë që po qëndrojnë qindra metra në thellësi të tokës, nuk kanë pasur asnjë vizitë nga Kryeministri, as nga Ministrja e as nga ndonjë tjetër pushtetar. Natyrisht që ikin – sepse premtimet e tyre të mëdha dje për Trepçën dhe minatorët, sot po vërtetohet të kenë qenë vetëm mashtrime”, ka shkruar ndër të tjera Krasniqi.
